Լուռ ակցիայի մասնակիցները, որոնք սոցիալական ցանցերի միջոցով կոչ են անում գահընկեց անել Լուկաշենկոյին, կոչ են արել բողոքի ակցիայի օրը հերթով անձայն հանձնվել ոստիկանությանը այնպես, որպեսզի ոստիկանական մեքենաները չհերիքեն: Այս մասին հայտնում է Gazeta.ru կայքը:
«Ինչպես միշտ, չորեքշաբթի օրը՝ հունիսի 29-ին, ժամը 19:00-ին, դուրս ենք գալիս մաքուր օդ շնչելու: Հենց ոստիկանական ավտոբուսը մոտենում է, որպեսզի սկսեն ձերբակալությունները, բոլոր նրանք, ովքեր չեն վախենում, հերթ են կանգնում ավտոբուսի առաջ և սկսում ծափահարել ու ծիծաղել: Մինսկի ոստիկանությունը 1200 հոգուց ավելի ձերբակալելու հնարավորություն ուղղակի չունի, իսկ հրապարակ դուրս կգա դրանից շատ մարդ»,- գրել են կազմակերպիչներն ինտերնետում:
Այս քայլը նման է 80-ականներին լեհական «Սոլիդարնոստի» կողմից իրականացված ակցիային: Այն ժամանակ երիտասարդ ակտիվիստներն իրենք էին վազում ոստիկանական մեքենաների մոտ և տեղ զբաղեցնում այնտեղ՝ խնդրելով իրենց էլ ձերբակալել: Իսկ իրավապահները ստիպված էին լինում նրանց դուրս վռնդել մեքենաներից:
