Նախընտրական քարոզարշավին մնացել է 4 օր․ դեկտեմբերի 8-ը լռության օր է, իսկ դեկտեմբերի 9-ին կկայանան արտահերթ խորհրդարանական ընտրությունները, և միայն ժամանակը ցույց կտա՝ արդյո՞ք հեղափոխության արդյունքները կկարողանա կապիտալիզացվել նոր ընտրությունների արդյունքում ու ինչպիսի նոր խորհրդարան կունենանք։
Քարոզարշավի ընթացքում հիմնական առանցքում ՀՀԿ-ՔՊ հակամարտությունն էր, անգամ մեղադրանքները, որոնք անընդհատ հնչում էին իրար հանդեպ։ Ինչպիսի՞ տրամադրություն սա թողեց էլեկտորալ զանգվածի տրամադրությունների վրա, ինչ շահեց կամ ինչից տուժեց հանրությունը այս պարագայում «Առաջին լրատվական»-ի հարցին քաղաքական մեկնաբան Հակոբ Բադալյանը պատասխանեց․ «Մեծ մասամբ, կարծում եմ, համահունչ էր այն տրամադրություններին, որ կար հասարակության շրջանում։ Իհարկե, նոր իշխանությունն այս ամիսների ընթացքում փորձել էր պահել այդ տրամադրությունը, բայց, կարծում եմ, որ օբյեկտիվ էր այդ իրականությունը, որովհետև մենք գործ ունեինք մի համակարգի հետ, որը միայն իշխանության դե յուրե կարգավիճակով չէր, որ կար, այլ բավական տարածված, սերտաճած էր հասարակության տարբեր շերտերում, և այս տեսանկյունից, համակարգն իր որոշակի ներկայությունն ուներ։ Դրա հետևանքն էր, որ նա նոր իշխանության հետ պահպանվում էր որպես դիմակայության կողմ, ու սպասելի էր, որ էդպես պետք է լիներ նախընտրական շրջանում»։
«Իհարկե, այս իրավիճակը հանրային որոշ շերտերին չի գոհացնում, շատերն ասում են, որ պետք է դուրս գալ սև ու սպիտակի տրամաբանությունից, կարծում եմ՝ դա տեղի կունենա ընտրություններից հետո»,- հավելեց քաղաքագետը։
Ամբողջությամբ՝ տեսանյութում։
