Այնպիսի տպավորություն է, որ ընտրական այս կամպանիային մասնակցում է երկու ուժ՝ Նիկոլ Փաշինյանի «Իմ քայլը» դաշինքը ու ՀՀԿ-ն, ընդ որում՝ նրանց հակադրությունն արտահայտվում է օնլայն ռեժիմով։
Առավոտյան Նիկոլ Փաշինյանի հասցեին «մահացու» մեղադրանքներ հնչեցրեց ՀՀԿ համամասնական ցուցակի երրորդ համար Դավիթ Շահնազարյանը՝ վարչապետին մեղադրելով Արցախը հանձնելու, բանակը միտումնավոր թուլացնելու մեջ։
Նիկոլ Փաշինյանը հանրապետականներին հակադարձել է Լոռվա մարզում ունեցած հանդիպումներում։ Նա մի շարք կոշտ հայտարարություններ է հնչեցրել Սերժ Սարգսյանի կուսակցության հասցեին։ Նրա խոսքով՝ եթե հասարակությունը վախենում է, որ Հանրապետականը կհայտնվի ԱԺ-ում, թող ոչ մի ձայն չտա այդ ուժին: «Դուք եք որոշում: Դուք եք որոշում՝ չի լինի, ուրեմն չի լինի: Ես կոչ եմ անում ձեզ՝ ոչ մի ձայն Հանրապետականին, որովհետև չի կարելի ներել, որովհետև փորձը ցույց է տալիս՝ ինչքան փորձում ենք լարումներ չմտցնել, ինչքան փորձում ենք սիրո և համերաշխության մթնոլորտը տարածել, ոմանք առիթավորվում են դրանից: Այս ընտրություններին կա կոնկրետ մի առաքելություն՝ հանրապետականների թալանչի բրիգադը պետք է ուղարկվի պատմության աղբանոցը: Ո՛չ մի ձայն հանրապետականներին»,- ասել է նա:
Ավելին՝ Նիկոլ Փաշինյանը մեծացրել է իր քննադատության հասցեականությունը ու, ըստ էության, քաղաքական արխիվացման անհրաժեշտություն է ձևակերպել մի շարք ուժերի համար։ «Ես ասում եմ՝ ձայն չտաք այն ուժերին, որոնք թեկուզ մեկ անգամ փորձել են ընտրակաշառք կիրառել: Ոչ մի ձայն այն ուժերին, որոնք ընտրակաշառք են կիրառել, ոչ մի ձայն այն ուժերին, որոնք մտածում են, որ ՀՀ-ում կարող են բռնության միջոցով հարցեր լուծել»,- ասել է նա։
Դժվար չէ ենթադրել, որ Նիկոլ Փաշինյանի ակնարկը վերաբերում է ոչ միայն նախկին համակարգը խորհրդանշող չորս կուսակցություններին, այլ նաև «Սասնա ծռեր» կուսակցությանը, որի հետ հակադրությունը սկսվել էր դեռ երեկ՝ այն բանից հետո, երբ Ժիրայր Սեֆիլյանի թիմը պնդել էր, որ դեկտեմբերի 9-ին ձևավորվելիք խորհրդարանը ժամանակավոր է լինելու, և երկու տարվա ընթացքում անհրաժեշտ է անցկացնել նոր արտահերթ ընտրություններ։
Նիկոլ Փաշինյանն այսօր Լոռվա մարզում սպառնացել է «ասֆալտին պառկեցնել» բոլոր այն գյուղապետերին, որոնք կփորձեն բռնանալ քաղաքացիների կամարտահայտության վրա։
«Իմ քայլը» դաշինքի առաջնորդի հռետորաբանությունը միգուցե խիստ է կամ աչքի է ընկնում արտահայտությունների ագրեսիվությամբ, սակայն նրա խոսքի բովանդակությունը ամբողջովին բխում է թավշյա հեղափոխության համատեքստից։ Հայաստանի նոր խորհրդարանում պետք է բացառվի այն կուսակցությունների ներկայությունը, որոնք անցած քսան տարիներին որևէ կերպ ասոցացվել են քրեաօլիգարխիկ համակարգի հետ։ Միայն այդ ժամանակ հնարավոր կլինի խոսել հեղափոխության արդյունքների ամբողջական կապիտալիզացիայի մասին՝ քաղաքական, ինստիտուցիոնալ հիմքեր ստեղծելով ռևանշիզմի բացառման համար։
Միևնույն ժամանակ՝ նոր Հայաստանում քաղաքակրթական, քաղաքական մակարդակում պետք է բացառվի քաղաքական բռնությունը, հեղափոխությունը գիլյոտինների ու կառափնարանի վերածելու մտայնությունը։ Սա նույնպես բխում է թավշյա հեղափոխության տրամաբանությունից, որի քաղաքակրթական հիմնական առաջնահերթությունը բռնության բացառումն էր։ Այս իմաստով Փաշինյանի թիմի ու «Սասնա ծռերի» հակասությունները խորքային են, եթե կուզեք՝ արժեքային են։
Սակայն ուշագրավ է մեկ այլ հանգամանք, որը «կարմիր թելի» նման անցնում էր Նիկոլ Փաշինյանի այսօրվա բոլոր ելույթներում։ Այնպիսի տպավորություն է, որ վարչապետը խնդիր է դրել ոչ միայն ապահովել իր դաշինքի լիակատար հաղթանակը, այլ նաև համապատասխան միջավայր ծնել, որտեղ կարող է ձևավորվել դեմոկրատական այլընտրանքը։ Համենայնդեպս, նրա կոշտ գնահատականները նախկին համակարգի ուժերին ու նաև «Սասնա ծռերին» հնարավորություն են ստեղծում դեմոկրատական այլընտրանքը մարմնավորող քաղաքական ուժերի ինքնադրսևորման համար։
Շատ կարևոր է, որ հեղափոխության օրակարգն ընդունող, սակայն Փաշինյանի թիմի հետ քաղաքական ու գաղափարական հակասություններ ունեցող ուժերը կարողանան այս կարճ ընթացքում հասարակությանը հասցնել իրենց ծրագրային ուղերձները։
