Ադրբեջանագետ Սարգիս Ասատրյանը, այսօր լրագրողների հետ հանդիպմանը խոսելով հայ-ադրբեջանական հակամարտությունից, ասաց, որ ամեն տարի երկու երկրների արտգործնախարարների հանդիպումից առաջ Ադրբեջանը սահմանին ակտիվացնում է կրակոցներն ու դիվերսիոն գործողությունները: Նրա հավաստմամբ՝ ցանկացած կարևոր հանդիպումից առաջ Ադրբեջանը դիմում է նման գործողությունների՝ այդ կերպ փորձելով ճնշում գործադրել Հայաստանի վրա:
Սահմանին ակտիվությունը նա նաև կապեց հունվարի 20-ի դեպքերի հետ. Ադրբեջանը չի կարողանում հարմարվել, որ կորուստներ ունի, և դիվերսիան ձախողվել է:
«Ադրբեջանը պատերազմի չի գնա, սակայն նրան ձեռնտու է այս իրավիճակը. այս կերպ ուզում է ճնշել Հայաստանին»,- ասաց նա:
Ս.Ասատրյանն ասաց, որ Ադրբեջանը վերջին օրերին ակտիվացել է նաև վիրտուալ աշխարհում, բազմաթիվ հակերային հարձակումներ է իրականացնում: Նրանց լրատվամիջոցները հայտարարում են, թե դիվերսիա չեն կազմակերպել, և հայկական կողմն է խախտել հրադադարի ռեժիմը:
Նրա համոզմամբ՝ ԱԳ նախարար Էդվարդ Նալբանդյանը պետք է օգտվի ընձեռված հնարավորությունից և բարձրաձայնի սահմանին կատարված դեպքերի մասին։
