«Երբ ասում ենք՝ դեկտեմբերի 9-ին ժողովուրդն ընտրելու է ընդդիմություն, խոսքը 7-րդ գումարման խորհրդարանում ընդդիմություն լինելու մասին է: Իսկ անցած վեց ամիսներին, այո՛, մենք թույլ չենք տվել, որ սաբոտաժներ արվեն խորհրդարանում, և ճիշտ ենք արել»,- լրագրողների հետ հանդիպմանն ասաց «Լուսավոր Հայաստան» կուսակցության ցուցակը գլխավորող՝ «Ելք» խմբակցության պատգամավոր Էդմոն Մարուքյանը:
Իսկ ՀՀԿ-ի այն կարծիքը, թե՝ միայն իրենք են քննադատել, և ուրեմն միայն իրենք կարող են լինել ընդդիմություն, Մարուքյանը չի համարում փաստարկ. «Հայաստանի պատմության մեջ նախ՝ որևէ մեկը ընդդիմություն չի դարձել քննադատելով՝ ընդդիմություն դառնում են կոնկրետ գործողություններով: Երկրորդ՝ ՀՀԿ-ականները վերադառնալու բոլոր հնարավոր քայլերը ձեռնարկել են, իսկ դա չի ստացվել: Երրորդ՝ եթե հանրապետականներն ուզում են լինել ընդդիմություն, ապա գոնե պետք է այրեն կամուրջները անցյալի հետ. գոնե 5 կեղեքչի անուն կարո՞ղ են հրապարակել և ասել՝ այ, դրանք մեր ժամանակ թալանել են, և մենք ինչ-ինչ պատճառներով լռել ենք: Ի վերջո՝ Սերժ Սարգսյանը Հանրապետական կուսակցության ղեկավարն է, և ես չեմ կարծում, որ ՀՀ քաղաքացիները ունեն նման զգացողություն, թե նա ընդդիմության առաջնորդն է»:
Մարուքյանը ընդգծեց՝ ընդդիմությունը ապագա իշխանությունն է. «Եվ ես էլի չեմ կարծում, որ ՀՀ քաղաքացիները ՀՀԿ-ին տեսնում են որպես ապագա իշխանություն»:
Մանրամասները՝ տեսանյութում:
