Երևանի «Վարդանանց ասպետներ» հիմնական դպրոցում նոյեմբերի 22-ին գեղանկարիչ Պետիկ Պետրոսյանի մասնակցությամբ կազմակերպվեց «Քո արվեստը դպրոցում» ծրագրի առաջին դաս-հանդիպումը: Ինչպես տեղեկացնում է , ՀՀ կրթության և գիտության նախարարի պաշտոնակատար Արայիկ Հարությունյանը լրագրողների հետ զրույցում նշեց, որ Կրթության և գիտության ու Մշակույթի նախարարությունների համատեղ նախաձեռնած «Քո արվեստը դպրոցում» ծրագրի նպատակն է, որ ժամանակակից արվեստագետները այցելեն դպրոցներ և մեծացնեն հետաքրքրությունը դպրոցականների շրջանում կերպարվեստի, երաժշտության և գրականության հանդեպ:
«Տարվա ընթացքում 50 արվեստագետ այցելելու է 30-ական դպրոց և իր արվեստն է ներկայացնելու աշակերտներին: Նրանք նկարիչներ են, երգիչներ, գրականության մասնագետներ և այլն: Մենք կարծում ենք, որ մեր աշակերտները ժամանակակից արվեստի հետ շփում չունեն: Այսպիսով, մենք արվեստը բերում ենք դպրոց, և վստահ եմ, որ այս ծրագիրն իրագործման արդյունքում աշակերտներին կտանի թանգարաններ, պատկերասրահներ և թատրոններ»,- ասաց Հարությունյանը:
Մշակույթի նախարարի պաշտոնակատար Լիլիթ Մակունցի խոսքով` այս ծրագրով ցանկություն կա ցույց տալու դպրոցականներին, թե ինչքան հետաքրքիր է մշակույթը և արվեստը:
«Մենք ցանկանում ենք, որ դպրոցականները լայնացնեն իրենց մտահորիզոնը և իրենց մեջ բացահայտեն մշակութային տաղանդը: Միգուցե, ապագայում նրանց հանդիպենք արդեն ցուցահանդես կազմակերպելու շրջանակներում»,-ընդգծեց Մակունցը:
Ներկայացված նախագծերի քննարկման և բոլոր դիմողների հետ կազմակերպված հարցազրույցների արդյունքում ընտրվել է կերպարվեստի, գրականության և երաժշտության ոլորտների 50 արվեստագետ և տեսաբան, որոնք վիճակահանության արդյունքում հնարավորություն են ստացել կյանքի կոչելու իրենց նախագծերը շուրջ 1400 հանրակրթական դպրոցներում ` յուրաքանչյուր մասնակիցը 30 դպրոցում:
Նախագծի վերջնական ընտրության հարցում որոշիչ են եղել ներկայացված նախագծի համապատասխանությունը «Քո արվեստը դպրոցում» ծրագրի բովանդակային և մեթոդական հիմնական չափորոշիչներին՝ նորարարություն, ինտերակտիվ ստեղծագործական մոտեցում, ներառականություն, շարունակականությունն ապահովելու հնարավորություն:
Ներգրավելով դպրոցականներին և ժամանակակից արվեստագետներին ստեղծագործական երկխոսության մեջ, «Քո արվեստը դպրոցում» ծրագիրը բացառիկ հնարավորություն է ստեղծում վերաարժևորելու արվեստի հետ կենդանի հաղորդակցման կարևորությունը ժամանակակից թվային տեխնոլոգիաների ժամանակաշրջանում, ինչպես նաև խթանելու միջսերնդային ճանաչողությունը և համագործակցությունը: Ծրագիրը միտված է դպրոցներում այլընտրանքային կրթության նորարարական հարթակ դառնալուն՝ նպաստելով արվեստի միջոցով երեխաների քննադատական, վերլուծական ու ստեղծարար մտքի ձևավորմանն ու զարգացմանը:
