Երևանի փոխքաղաքապետ Կամո Արեյանը երեկ քաղաքապետարանում ասուլիս էր հրավիրել` ներկայացնելու, թե ինչ է արել քաղաքապետարանն անցյալ տարի: Պարզվեց` նախորդ տարի քաղաքապետարանը աննախադեպ գումար` մոտ 13 մլրդ դրամ` ավելի քան 32 մլն ԱՄՆ դոլար է ծախսել ասֆալտապատման, մայթերի ու մայթեզրերի նորոգման համար: «2.5 մլն քառակուսի մետր ճանապարհ ենք նորոգել, մոտ 300 փողոց, հազարավոր քառակուսի մետրերով մայթեր, Վարդան Մամիկոնյանի արձանի և «Մոսկվա» կինոթատրոնի հարակից հրապարակները»,- ասաց փոխքաղաքապետը:
Հիշեցնենք, որ տարին ընտրական էր. փետրվարին տեղի ունեցան նախագահական, իսկ մայիսին` Երևանի ավագանու ու քաղաքապետի ընտրությունները, ու ավագանու ընտրություններն ընթանում էին ասֆալտապատման լայնածավալ աշխատանքներին զուգընթաց: Ընդ որում` հիմնականում նորոգվում էին վերջերս նորոգված փողոցները ու հատկապես կենտրոնում: Անցյալ տարի քաղաքապետարանը 3 անգամ ավելի գումար է ծախսել ասֆալտապատման, ճանապարհների ու մայթերի վերանորոգման համար, քան քաղաքապետարանի բյուջեով նախատեսված է այս տարի: Այս տարի քաղաքապետարանը նույն աշխատանքների համար կծախսի 4.2 մլրդ դրամ:
Նշենք, որ Երևանի քաղաքապետարանը անցյալ տարի ավելի քան կես մլն ԱՄՆ դոլար է ծախսել թափառող շների դեմ պայքարի համար, սակայն հանրությանն այդպես էլ որևէ բացատրություն չի տրվում, թե ինչու է նման շռայլություն թույլ տալիս քաղաքապետարանը հարկատուներիս հաշվին, և արդյոք այդքան գումարի աշխատանք կա՞ անելու թափառող շների հետ: Ի դեպ, այս տարի ևս քաղաքապետարանը շարունակելու է «հուժկու պայքարը» թափառող շների դեմ: Երևան քաղաքի 2014 թվականի բյուջեի նախագծով քաղաքապետարանը կրկին 220 մլն դրամ գումար է հատկացրել եկող տարի շների դեմ պայքարելու համար: Սա մոտ 550 հազար ԱՄՆ դոլար գումար է: Հիշեցնենք, որ մրցույթը ավանդաբար շահում է «Յունիգրաֆ-Իքս» ընկերությունը:
Բնապահպանները նշում են, որ քաղաքապետարանի բյուջեից հավելյալ գումարներ ստանալու նպատակով հայտամրցույթում ուռճացված կերպով նշված է, թե Երևանում 46 հազար թափառող շուն կա: Սա այն դեպքում, երբ օրինակ` Մոսկվայում այդ թիվը 25 հազար է: Ընդ որում՝ նույն թիվը քաղաքապետարանն արդեն մի քանի տարի ներկայացնում է, ուստի և պետական միջոցների ոչ նպատակային օգտագործման դեմ պայքարի շրջանակում կարելի է հարցնել` եթե «Յունիգրաֆ-Իքս»-ը շներին լայնածավալ քնեցնում կամ ստերիլացնում է, ինչպե՞ս է, որ թափառող շների՝ քաղաքապետարանի ներկայացրած թվաքանակը չի պակասում:
Օրինակ` վերելակների նորոգման համար նախատեսված է մոտ 97 մլն դրամ: Սա այն դեպքում, երբ ամռանը Կենտրոն համայնքի բնակիչներից մեկը մահացավ վերելակի անսարքության հետևանքով` ընկնելով վերելակի հորը: Իսկ չորրորդ աստիճանի վթարային շենքերի քանդման հետևանքով բնակտարածություններից զրկված բնակիչների փոխհատուցման համար բնակարանների ծրագրով նախատեսվել է 500 մլն դրամ: Ընդամենը մոտ երկու անգամ ավելի շների դեմ պայքարի համար շռայլորեն տրվող գումարից:
Երևան քաղաքի 2014 թվականի բյուջեի նախագծով քաղաքապետարանը կծախսի 69,4 մլրդ դրամ, ինչը այս տարվա բյուջեի ծախսային մասից ավելի է 3,4 մլրդ դրամով, իսկ 2012 թվականի փաստացի ծախսերից 10,4 մլրդ դրամով:
Քաղաքապետարանի ծառայողական մեքենաների շահագործման ու պահպանման համար նախատեսված է 100,8 մլն դրամ` նախորդ տարվա 96,1 մլն-ի փոխարեն: Մեքենաների և սարքավորումների նորոգման և պահպանման գծով ևս 275 մլն դրամ է նախատեսվել, ինչը նախորդ տարվանից ավելի է 3,7 մլն դրամով: Բացի դա, քաղաքապետարանը ծրագրում է 6 նոր ավտոմեքենա գնել` վարչական շրջանի ղեկավարների տեղակալների մեքենաները փոխելու համար: Դրա համար նախատեսում է Երևանի բյուջեից ծախսել 30 մլն դրամ:
Քաղաքապետարանի պաշտոնյաների և ավագանու, վարչական շրջանների ղեկավարների աշխատակազմերի գործուղումների համար նախատեսվել է 70,5 մլն դրամ:
Քաղաքապետարանը եկող տարի 6,4 մլն դրամի ծաղկային կոմպոզիցիաներ և ծաղկեպսակներ ձեռք կբերի` մշակութային միջոցառումների, տոնական և հիշատակի օրերի և այլ դեպքերի համար:
Ամենաթանկը քաղաքապետարանի վրա ավտոմեքենաներն են նստում. պարտադիր վճարների գծով ծրագրվել է 3,1 մլն դրամ, որը նախատեսվել է ավտոմեքենաների տեխնիկական զննման ծախսերի և տուրքերի վճարման համար:
2014-ի բյուջեով մայրաքաղաքի դրոշների սպասարկման համար նախատեսված է 80 միլիոն դրամ` մոտ 200 հազար ԱՄՆ դոլար, ինչը Երևանի քաղաքապետի առաջին տեղակալ Կամո Արեյանը արդարացված ծախս է համարում… «Պետական դրոշը իր ներկայությունը պետք է ունենա մայրաքաղաքում` «Պետական դրոշի մասին» օրենքի համաձայն… Քաղաքում տարբեր դիրքերում տեղադրված է մեծ ֆորմատի պետական դրոշը, այս մշակույթը աշխարհի շատ քաղաքներում կա… Այդ դրոշների սյունն է մաշվում, մթնոլորտային ազդեցություններից վնասվում է, կտորն է մաշվում, ստեղծվել է մի ցանց, որը պետք է պահպանել, սպասարկել, ինչի համար այդ ծախսը արդարացված է մեր բյուջեում»,- ասաց փոխքաղաքապետը:
