Այսօր լրագրողների հետ ճեպազրույցում ԿԳ նախարար Արմեն Աշոտյանից լրագրողները հետաքրքրվեցին երկրորդ նախագահ Ռոբերտ Քոչարյանի գրասենյակի տարածած հաղորդագրությունից, որտեղ կային դիտարկումներ նաև իր վերաբերյալ. «Ես իմ գնահատականներն այս առնչությամբ հնչեցրել եմ մի քանի օր առաջ ասուլիսի ընթացքում, այս ընթացքում չեն հնչել հակադարձումներ կամ լրացուցիչ փաստարկներ, որոնց կապացությամբ ես կարիք չեմ տեսում ևս մեկ անգամ անդրադառնալու այս հարցին»:
Ռոբերտ Քոչարյանի՝ երիտասարդ հանրապետականների մասին գնահատականի հետ կապված էլ նկատեց. «Եթե 13 տարվա կուսակցական փորձ և 39 տարվա անձնագրային տարիք ունեցող մարդը համարվում է երիտասարդ կուսակցական, ուրեմն ես գտել եմ հավերժ երիտասարդության գաղտնիքը»:
Հայաստանը Արևելյան Հայաստանի Հանրապետություն անվանելու իր առաջարկի հետ կապված էլ ասաց. «Ես տվել եմ առաջարկություն հանրային քննարկման համար, շատ շնորհակալ եմ, որ այն բուռն քննարկումներ և արձագանքներ է գտել, արդեն երկու օր է՝ և՛ մասնագետները, և՛ հասարակական-քաղաքական գործիչները, և՛ շարքային քաղաքացիներն իրենց կարծիքները հայտնում են, շնորհակալ եմ, որ այդ քննարկումներն իրոք ծավալվել են, դա նշանակում է, որ առաջարկությունը հետաքրքրաշարժ է եղել, մտորելու, մտածելու, պատմությունը վերարժևորելու, քաղաքական ենթատեքստերը վերաիմաստավորելու և Ցեղասպանության 100-ամյակի նախաշեմին մեր հնարավոր քայլերի հաջորդականությունը, ուժգնությունը վերաիմաստավորելու հնարավորություն է տալիս»:
