Վերջին օրերին Հայաստանում հասարակության զգալի մասն ապրեց ֆուտբոլով: Ուշադրությունը սևեռված էր Հայաստանի ազգային հավաքականի վրա, որն իր ելույթներով նախ հիասթափեցրեց, այնուհետև հիացրեց երկրպագուին:
Հիշեցնենք, որ Ազգերի լիգայի խաղարկության շրջանակներում հոկտեմբերի 13-ին մեր հավաքականը Երևանում 0:1 հաշվով Ջիբրալթարին զիջելուց հետո երեք օր անց 4:0 հաշվով ջախջախեց ենթախմբի ֆավորիտ Մակեդոնիայի հավաքականին:
Ջիբրալթարի հետ հանդիպումը, բացի խայտառակ խաղից, նշանավորվեց նաև խաղավարտին երկու ֆան-ակումբների՝ ՖԱՖ-ի և «Ռեդ Իգլսի» միջև տեղի ունեցած ծեծկռտուքով: Միջադեպին անդրադարձավ նաև Հայաստանի ֆուտբոլի ֆեդերացիայի նախագահ Արթուր Վանեցյանը: «Բացասական եմ գնահատում այդ միջադեպը: Նրանք միշտ բողոքում էին, որ ֆեդերացիան իրենց չի հատկացնում այն տեղերը, որոնք իրենք ցանկանում են, և տոմսերի գներն էլ իրենց ուզածը չեն: Խաղից առաջ հանդիպում էի ունեցել երկու ֆան-ակումբների ներկայացուցիչների հետ, նրանց առաջարկել էի նստել դարպասների ետևում: Մեկը՝ Հյուսիսայինում, մյուսը՝ Հարավայինում, բայց երկուսն էլ շատ բացասաբար ընդունեցին այդ առաջարկը: Խոստացել էին, որ ոչ մի միջադեպ չի լինի, չպահեցին իրենց խոստումը, ու բոլորս գիտենք, թե ով: Բայց չեմ ցանկանում այդ մասին խոսել: Միայն կասեմ, որ այն տեղեկությունը, թե ֆեդերացիան տուգանվել է 100 հազար եվրոյով, սուտ է: Իհարկե, պատիժ կլինի ՈՒԵՖԱ-ի կողմից, բայց դեռ չգիտենք, թե ինչպիսի: Նման երևույթները վնասում են ոչ միայն մեր հեղինակությանը, այլև ֆինանսական խնդիրներ են առաջացնում»,- ասել էր ՀՖՖ նախագահը:
Տեղի ունեցածն իսկապես տհաճ էր, քանզի միջադեպը տեղի ունեցավ միևնույն թիմը երկրպագող ֆանատների միջև: Ամեն դեպքում ընդունենք, թե չընդունենք՝ մարզադաշտերում տեղի ունեցող նման միջադեպերը ֆուտբոլի մի մասն են կազմում: Հավանականությունը մեծ է, որ հսկայական էներգետիկայով լեցուն միջավայրում այնուամենայնիվ տեղի կունենան պոռթկումներ: Տվյալ դեպքում խիստ անհաջող խաղով Հայաստանի հավաքականը բացասական էներգիայով ներարկել էր «Հանրապետական» եկած երևի թե բոլոր երկրպագուներին:
Ջիբրալթարի և Մակեդոնիայի հավաքականների հետ հանդիպումներից հետո կարող ենք արձանագրել կարևոր մի իրողություն: Տվյալ հանդիպումներում մենք տեսանք բոլորովին նոր «աուդիտորիա»: Խոսքը միայն ՖԱՖ-ի կամ «Ռեդ Իգլսի» կատարած աշխատանքի մասին չէ: Այո, ֆան ակումբները մթնոլորտի շարժիչ ուժն են, բայց առանց համապատասխան արձագանքի նման էֆեկտ ուղղակի չէր լինի: Հայաստանի հավաքականի վերջին հանդիպումների տեսագրությունը դիտելիս համոզվում ենք, որ դիտում ենք ֆուտբոլ: Ավելի ստույգ՝ խաղին զուգորդող վանկարկումները ուղղակի զարդարում են թեկուզ թույլ խաղը: Նույնը չես կարող ասել, օրինակ, Ռուսաստանի, Ղազախստանի, Բելառուսի, նաև Վրաստանի հավաքականների մասնակցությամբ հանդիպումների մասին: Նշված երկրներում ազգային հավաքականի հանդիպումների ժամանակ մարզադաշտում ուղղակի աղմուկ է, և միայն որոշ դեպքերում կարելի է լսել պրիմիտիվ ռիթմային վանկարկումներ:
Ուշագրավն այն է, որ մարզադաշտում ֆուտբոլային մթնոլորտի խթանիչ ուժն ամենևին ազգային հավաքականը չէ: Վերջինս ընդհանուր առմամբ իր ելույթներով չի հիացնում: Հատկապես վերջին երկու-երեք տարիներին մեր գլխավոր թիմն ուղղակի նյարդեր է քայքայել: Թվում էր, թե Ջիբրալթարից կրած պարտությունից հետո «Հանրապետական»-ը կիսադատարկ կլինի, և չեն լինի բուռն վանկարկումներ: Մակեդոնիայի հանդիպման հենց առաջին րոպեից մոտ 10 հազար երկրպագուներ ուղղակի առաջ էին մղում ֆուտբոլիստներին: Պատկերն իսկապես տպավորիչ էր:
«Հանրապետական»-ում տեղի ունեցած ֆուտբոլային հեղաշրջումը կարող է թերևս մեկ բացատրություն ունենալ՝ թավշյա հեղափոխությունը շատ արագ մուտք գործեց նաև ստադիոն: Փոխվել է նաև գիտակցությունը: Ֆուտբոլասերն այսօր կարող է պահանջել և նույնիսկ ստիպել ֆուտբոլիստներին ցուցադրել արժանի խաղ: Հիշենք 2018 թվականի աշխարհի առաջնության ընտրական փուլի ավարտը: Մերոնք ձախողվեցին, և նոյեմբերին տեղի ունեցած Էստոնիայի և Լիտվայի հանդիպումներին մարզադաշտ էր եկել մի քանի տասնյակ ֆուտբոլասեր: Նույնիսկ ֆան ակումբները չէին ցանկանում լինել ազգային թիմի կողքին: Տեղի էր ունեցել տոտալ բոյկոտ:
Երկրպագուների շրջանում տեղի ունեցած զարթոնքի մեջ մեծ դերակատարում ունի նաև ՀՖՖ նոր ղեկավարությունը, որը զգալիորեն էժանացրեց ազգային հավաքականի մասնակցությամբ հանդիպումների տոմսերը: Եթե ժամանակին մարդիկ «Հանրապետական» էին գալիս ազգային հավաքականի մի քանի հաջող ելույթներից հետո, ապա այսօր մարդիկ մարզադաշտ են գնում, որպեսզի օգնեն ֆուտբոլիստներին հաղթել:
Ազգային հավաքականի և երկրպագուների միջև առկա պատնեշը վերջնականապես կոտրված է: Երկրպագուի մոտ լինելը, կարծում ենք, զգացին նաև ազգային թիմի ֆուտբոլիստները, որոնք ֆանատների հետ հանդիպումներից հետո կերպարանափոխվել էին: Սա պետք է օրինակելի նախադեպ հանդիսանա առաջիկա հանդիպումների համար: Պարզ է մեկ բան՝ հավաքականի տերը երկրպագուն է, որը իրավունք ունի և՛ պահանջելու, և՛ երկրպագելու, և՛ ցնծալու:
