«Ինչպե՞ս կարելի է Ռոբերտ Քոչարյան անունը տալ, քննարկել նրան հետ բերելու հարցերը, քանի դեռ չեն պարզաբանվել Հոկտեմբերի 27-ն ու Մարտի 1-ը: Եվ ընդհանրապես, երկու անձնավորություն կա, որ չպետք է տեղ ունենան հայ քաղաքականության մեջ: Դա Ռոբերտ Քոչարյանն ու Սերժ Սարգսյանն են»,-անդրադառնալով հայաստանյան ներքաղաքական խնդիրներին, մասնավորապես Քոչարյան-Սարգսյան հակամարտությանը և դրա պատճառներին` «Առաջին լրատվական»-ի հետ զրույցում ասաց Լոս Անջելեսի AMGA հայկական հեռուստաալիքի «Վարագույր» ծրագրի տնօրեն, քաղաքական մեկնաբան Ռուդիկ Հովսեփյանը:
Նրա խոսքով` Ամերիկայի հայ համայնքը ակտիվորեն հետևում է Հայաստանում տեղի ունեցող ներքաղաքական զարգացումներին: Եվ իրենք բացարձակապես դեմ են Քոչարյանի վերադարձին: «Այստեղի ժողովուրդը շատ նվիրյալ է և ամեն մի հարցը քննարկում է, կարծեք թե Հայաստանում է ապրում, և բոլորն էլ, բացառությամբ նրա կողմնակից 1-2 հոգու, կատեգորիկ դեմ են Քոչարյանի վերադարձին: Սփյուռքը որևէ կերպ չի ընդունում Ռոբերտ Քոչարյանի ներկայությունը Հայաստանում: Ոչ թե որպես նախագահ կամ վարչապետ, այլ նրա ներկայությունը Հայաստանում առհասարակ»,- ասաց Հովսեփյանը:
Վերջինս Քոչարյան-Սարգսյան պատերազմական վիճակին այդքան էլ չի հավատում: «Դա ևս կարող է խաղ լինել, որովհետև Քոչարյանն այնպիսի անձնավորություն է, որ ամեն խաղի կգնա: Ես կարծում եմ, որ այստեղ կա մի գաղտնիք, որը դեռ բացահայտված չէ: Բայց ամեն ինչ արվում է, որ 2018 թվականի նախագահական ընտրությունների ժամանակ Քոչարյանն արդեն ուժեղ անուն ունենա: Եվ նույնիսկ ռուսական ԿԳԲ-ի (ռուսական իշխանությունների) միջոցով ամեն ինչ արվում է, որ Սերժ Սարգսյանը վերադառնա վարչապետության և վարչապետական իշխանություն սահմանվի»: Հովսեփյանի խոսքով` իշխանությունների այս սցենարը չի հաջողվի միայն ուժեղ ընդդիմության պարագայում: «Եթե մենք կարողանանք ուժեղ ընդդիմություն ստեղծել՝ չի հաջողվի: Իսկ եթե ընդդիմությունը մնա այսպես և լողա նույն սպասի մեջ, ինչի մեջ իշխանությունն է, Ռոբերտ Քոչարյանն ու Գագիկ Ծառուկյանը, ուրեմն նրանց կհաջողվի իրագործել այդ սցենարը: Բայց մենք կանգնած ենք Հայաստանի իսկական ընդդիմության կողմը, որը ոչ բարեկամ է Գագիկ Ծառուկյանի հետ, ոչ էլ Ռոբերտ Քոչարյանի հետ: Մենք բարեկամ ենք ժողովրդի հետ, նրա կողքին ենք, և եթե հարկ լինի, նորից կհամախմբվենք և նորից 35-40 հազար մարդ փողոց դուրս կբերենք»:
Հովսեփյանը Հայաստանում տեսնում է այդպիսի ընդդիմություն, որը արդեն իսկ վարկաբեկված որևէ քաղաքական ուժի հետ առնչություն չունի: Այդ ընդդիմությունը, նրա խոսքով, այսօրվա այն երիտասարդությունն է, որը փողոց է դուրս եկել: «Թող լինեն 500 հոգի, բայց նրանք են մեր ապագան: 88-ին էլ ամեն ինչ 200 հոգուց սկսվեց: Պարզապես այդ երիտասարդությանը մի քաղաքական հովիվ է հարկավոր, որը առաջ կտանի նրանց: Մենք տեսնում ենք, որ այդ երիտասարդությունը կգա և կմաքրի սուտ ընդդիմությունը և այս հանցագործ իշխանությունը»,- ասաց Հովսեփյանը՝ հավելելով. «Ցավոք, պետք է նշեմ, որ Լևոն Տեր-Պետրոսյանի պահվածքը վերջերս շատ անհասկանալի էր սփյուռքի համար, որովհետև մենք այստեղ շատ գործ արեցինք, որ բարձրացնեինք Լևոն Տեր-Պետրոսյանի իմիջը` սկսած 1991 թվականից, ինչ Դաշնակցությունը գցել էր նրա իմիջը: Մենք բարձրացրինք այդ իմիջը, բայց, ցավոք, Տեր-Պետրոսյանը 2008-ի մարտի վերջից իր երիտասարդ քաղաքական գործիչներով ամեն ինչ արեց, որ Լևոն Տեր-Պետրոսյան աջակցման կենտրոնը ուղղակի պառակտվի: Մեղավորը հենց իրենք էին: Բայց ասում եմ` մենք հավատում ենք, որ երիտասարդությունը կգա և կմաքրի դաշտը: Հայաստանը պետք է ազատ ու անկախ լինի, ոչ թե Մաքսային միության մեջ ու ամբողջ կյանքը ռուսի սապոգից հոտ քաշելուց»:
