«Նոր ԶԼՄ-ներ, նոր մարտահրավերներ. առաջավոր փորձը նոր դարաշրջանում» թեմայով սեմինարով ավարտվում է հայ և թուրք լրագրողների համար կազմակերպված փորձի փոխանակման ծրագիրը: Այն կազմակերպել է Լրագրողների միջազգային կենտրոն ամերիկյան կազմակերպությունը։ 3-շաբաթյա ծրագրին մասնակցել և ամերիկյան առաջատար լրատվամիջոցներում պրակտիկա են անցել 7 թուրք և 6 հայ լրագրողներ։ Ինչպես մեզ հետ զրույցում հայտնեց ծրագրի ղեկավար Ջոաննա Կորելոն՝ հատկապես հայ և թուրք լրագրողների հետ փորձի փոխանակման ծրագրի իրականացումը նախաձեռնվել է Հայաստանում և Թուրքիայում գործող դեսպանատների կողմից՝ հարաբերություններ չունեցող երկրների հասարակություների միջև շփում ստեղծելու նպատակով։
«Կարծում եմ՝ Հայաստանում լրագրությունը զարգացման փուլում է։ Լրագրողները պայքարում են ազատ արտահայտման իրենց իրավունքի համար։ Նրանք անցնում են այն նույն ճանապարհը, որով ժամանակին անցել ենք մենք ժողովրդավարացման ճանապարհին»,- ասում է ամերիկացի լրագրող Բոբ Գաբորդին, որն իր տանը հյուրընկալել է ծրագրի մասնակից հայ լրագրողներից մեկին։
Հայաստանի և ԱՄՆ-ի լրատվական դաշտը կոնֆերանսի մասնակիցները չեն ուզում համեմատել։ Նախ՝ ԱՄՆ-ում ինտերնետի հասանելության խնդիր չկա, ուստի նոր սոցիալական մեդիաները արագ են զարգանում և օգտագործվում են հասարակության գերակշռող մեծամասնության կողմից։ Արդյունքում՝ օնլայն լրատվամիջոցներից շահույթ ստանալու մեխանիզմներ են մշակվել։ Ըստ Բոբ Գաբորդի՝ օնլայն լրատվամիջոցների զարգացումը ԱՄՆ-ում չի հանգեցրել տպագիր մամուլի ժողովրդականության նվազման, քանի որ ամերիկացիները ունեն թերթ կարդալու մշակույթ։
