Yerevan productions ընկերությունը, որի ամենահայտնի բրենդը ռուսալեզու Ереван ամսագիրն է, սկսում է նոր հայալեզու ամսագրի հրատարակությունը։ Այսպիսով՝ ընկերության «Երևան մեդիա» նախագծի անգլերեն, ռուսերեն ամսագրերին, ինչպես նաև еrevan.ru կայքին ավելանում է ևս մեկ լրատվամիջոց, մոտ ժամանակներս էլ կբացվի նաև «Երևան»-ի ֆրանսերեն կայքը։ Եթե օտար լեզուներով տպագրվող «Երևան» ամսագրերը ներկայացնում են Հայաստանն ու մեր մայրաքաղաքը դրսում, ապա հայերեն տարբերակը հենց երևանցիների համար է, ուստի «Երևանի» բովանդակությունը պատմում է հետաքրքիր մանրամասներ մեր մայրաքաղաքի պատմության, արդի վիճակի, վերջին զարգացումների և խնդիրների մասին։
«Երևանի» էջերում կարող եք կարդալ պատմություններ ինչպես հայտնի երևանցիների, այնպես էլ մեր քաղաքի բաղկացուցիչ մաս կազմող հասարակ բնակիչների՝ կոշկակարների, տաքսիստների, գրաֆիտիով զբաղվող երիտասարդների մասին։
Հայալեզու «Երևան» ամսագրի առաջին համարում կարող եք կարդալ Արթուր Մեսչյանի հարցազրույցը քաղաքի ճարտարապետական դեմքի մասին, ծավալուն հոդված Երևանի՝ ժամանակին երկրորդ ամենաաշխույժ կենտրոնի՝ կայարանի և դրա հեռանկարների մասին։ Հարցազրույց Երևանի քաղաքապետի հետ, ինչպես նաև շատ այլ հետաքրքիր հոդվածներ։
Ի դեպ, ինչպես «Առաջին լրատվական»-ին հայտնեց «Երևան» ամսագրի գլխավոր խմբագիր Արտավազդ Եղիազարյանը, ամսագիրը լույս է տեսնելու 3000 տպաքանակով և երևանցիներին բաժանվելու է անվճար։
Հայերեն «Երևան»-ի շնորհանդեսը տեղի կունենա այսօր՝ Հյուսիսային պողոտայում, որտեղ ելույթ կունենա նաև «Դորիանս» խումբը։
