Այսօր արդեն սենսորային էկրանով կամ հետևի տեսախցիկով սեդանները տեխնոլոգիապես հագեցած ավտոմեքենաներ չեն համարվում: Դրանք յուրահատուկ մեքենաներ են, որոնք տեխնոլոգիաների շնորհիվ կարողացել են ավտոարտադրության մեջ իրենց խոսքն ասել:
Volkswagen XL1-ն աշխարհում տեխնոլոգիապես հագեցած և ամենատարօրինակ մեքենաներից մեկն է: Առաջին հերթին այն պատճառով, որ առաջին հայացքից դա ակնհայտ չէ: Չնայած սուպեր կոնցեպտն այնքան էլ ժամանակակից տեսք չունի և սովորական B-դասի արագություն է զարգացնում՝ այն ընդամենը 795 կգ է կշռում և չափազանց տնտեսող է. 100 կմ-ը անցնում է մեկ լիտր դիզելով: XL1-ը հագեցած է էլեկտրոշարժիչով և մարտկոցներով, որոնցով մեքենան կարող է 35 կմ անցնել:
Porsche 918 Spyder-ը հագեցած է 887 ձիաուժանոց էլեկտրաբենզինային շարժիչով: 100 կմ/ժ-ն այն զարգացնում է 2,8 վայրկյանում, ընդ որում՝ մեքենայի առավելագույն արագությունը 344 կմ/ժ է: Այս մոդելը 100 կմ-ի համար ընդամենը 3,3 լիտր բենզին է ծախսում: 918 Spyder-ը 700 հազար եվրո արժե:
Audi e-tron Spyder-ը նույնպես հիբրիդ է: Սակայն բենզինի փոխարեն դիզելով է աշխատում: 100 կմ/ժ արագությունը մեքենան զարգացնում է 4,4 վայրկյանում: Մեքենան ֆուտուրիստական դիզայն ունի, ինչպես նաև սուպերժամանակակից MMI մուլտիմեդիական համակարգ: Ոչ պաշտոնական տվյալներով՝ մեքենան 50 հազար դոլար արժե:
BMW i8-ն ապագայի մեքենա է, որը կարելի է ձեռք բերել արդեն հիմա: Մեքենայի լուսարձակները լազերային աղբյուրով են: Այն ամբողջովին էլեկտրական չէ, սակայն տնտեսող է. 100 կմ-ն անցնում է 2,5 լիտր բենզինով: 100 կմ/ժ արագությունը զարգացնում է 4,4 վայրկյանում:
