2013 թվականի տվյալներով՝ Չինաստանի միջազգային առևտրի ծավալն աճել է 7.6 տոկոսով և պատմության մեջ առաջին անգամ հատել 4 տրիլիոն դոլարի նշագիծը: Ցուցանիշը կազմում է 4.16 տրիլիոն դոլար: Այս մասին հայտնում է SBS-ը՝ հղում անելով երկրի Մաքսային գլխավոր վարչությանը:
ԱՄՆ-ի արտահանման և ներկրման մասին տվյալները դեռևս չեն հրապարակվել, սակայն կարծիք կա, որ Չինաստանն առաջ է անցել ԱՄՆ-ից: Դա խոստովանում են նաև Չինաստանի մաքսային ծառայությունում: 2013-ի 11 ամիսների արդյունքներով ԱՄՆ առևտրային հաշվեկշիռը կազմել է 3.57 տրիլիոն դոլար:
Չինաստանի առևտրային հաշվեկշռի տարեկան ավելցուկն աճել է 12.8 տոկսով և հասել է 259 միլիարդ դոլարի: Չինաստանի խոշորագույն առևտրային գործընկերն է ԵՄ-ն, որին հետևում են ԱՄՆ-ը, ասիական երկրները, ներառյալ Հոնկոնգն ու Ճապոնիան:
Զարգացած երկրների մասնաբաժինն առևտրի շուկայում ընկնում է՝ տեղը զիջելով զարգացող երկրներին: Չինաստանն ակտիվորեն նոր շուկաներ է բացում իր համար:
Աֆրիկայի տնտեսությունում ներդնելով ավելի ու ավելի շատ գումարներ՝ Չինաստանն ընդլայնում է այնտեղից գյուղատնտեսական արտադրանքի և իր արդյունաբերության համար հումքի ներկրման ծավալները: Աֆրիկայից Չինաստան արտահանման ծավալները 2001-ի 5.6 մլրդ դոլարից 2011-ին հասնել են 93.2 մլրդ դոլարի:
