«Մանչեսթեր Յունայթեդ»-ի կիսապաշտպան Ուեյն Ռունին հայտնել է, որ թիմի համար անչափ կարևոր է երկրպագուների աջակցությունը: Անգլիացին խնդրել է, որ նրանք համբերատար լինեն և աջակցություն ցուցաբերեն թիմի համար այս բարդ շրջանում:
«Երկրպագուների աջակցությունն անչափ կարևոր է: Նրանք հիանալի են դրսևորում իրենց հիմա, երբ մենք այնքան էլ լավ մարզավիճակում չենք և պարտություն ենք կրում վերջին մի քանի հանդիպումներում: Եթե մեր երկրպագուները չհիասթափվեն, մենք ավելի լավ կխաղանք:
Կարևոր է, որ նրանք համբերատար լինեն, մինչև մենք կցուցադրենք մեր լավագույն խաղային որակները: Վստահ եմ, որ մենք կանենք դա»,- Goal. com-ը մեջբերում է Ռունիի խոսքերը:
Հիշեցնենք` «կարմիր սատանաներ»-ը պարտություն են կրել վերջին երեք հանդիպումներում: Անգլիայի առաջնության ընթացիկ մրցաշրջանի մրցաշարային աղյուսակում թիմը զբաղեցնում է 7-րդ հորիզոնականը` իր ակտիվում գրանցելով 34 միավոր:
