Նյու Յորք նահանգի իշխանությունները մտադիր են 16 մլրդ դոլար ծախսել ենթակառուցվածքների ստեղծման վրա՝ պաշտպանվելու համար բնական աղետներից, ինչպիսին էր, օրինակ, «Սենդի» փոթորիկը»՝ հայտնում է ITAR-TASS-ը:
Այս մասին հայտնել է նահանգապետ Էնդրյու Կուոմոն ԱՄՆ փոխնախագահ Ջոզեֆ Բայդենի հետ հանդիպումից հետո, որն աշխատանքային այցով այցելել էր նահանգի մայրաքաղաք Օլբանի:
Հանդիպման ընթացքում Կուոմոն Բայդենին ներկայացրել է փոթորիկներից ու այլ բնական աղետներից պաշտպանվելու՝ մասնագետների կողմից մշակված ծրագիր, որի համաձայն՝ նախատեսվում է օդերևութաբանական կայանների թիվը 27-ից հասցնել մինչև 125-ի, կատարել 100 կամուրջների ու նահանգի մետրոյի մոտ 500 թունելների ամրացման աշխատանքներ:
Բացի այդ՝ նահանգում ծրագրվում է ստեղծել հատուկ քոլեջ, որտեղ կպատրաստվեն փրկարարներ:
«Սենդի» փոթորկի հետևանքով ԱՄՆ-ում մահացել էր 130 մարդ, որոնցից 43-ը՝ Նյու Յորքում: Հազարավոր մարդիկ Նյու Յորքում, Նյու Ջերսիում ու Կոնեկտիկուտում մնացել էին առանց տանիքի:
