ԱԺ պատգամավոր, ՀՀԿ խմբակցության անդամ Մանվել Բադեյանը Ամանորին պատրաստվում է գնալ հանգստանալու: «Նոր տարուն գնալու եմ էստեղից մի տեղ, գնում եմ հանգստանամ, գամ: Վերջին մի քանի տարիներին տանը չեմ նշում»,- «Առաջին լրատվական»-ի հետ զրույցում ասաց նա: Հարցին՝ որտեղ է սովորաբար նշում Ամանորը, նա պատասխանեց. «Նայած տարի, այս տարի դեռ չեմ որոշել: Ձմեռ պապի ենք կանչում, Ձյունանուշիկ ենք կանչում, ես փոքր երեխաներ ունեմ, չէ՞, շամպայն ենք բացում, տոլմա ենք ուտում: Ես առանձնապես ուտելու հետ սեր չունեմ, անկեղծ եմ ասում, և ընդհանրապես չեմ խմում. տասնմեկ տարի է՝ ոչ մի բաժակ չեմ խմում»:
Ամանորի ծախսերից պատգամավորի ընտանեկան բյուջեն ճեղքվածք չի տալիս: Նա նշեց, որ գալիք տարուց մեծ սպասելիքներ չունի, ոչ մեկին էլ չի խոստանա՝ առավոտը մի օր զարթնելու են և տեսնելու, որ յուղ ու մեղրի մեջ թավալված են: «Չի լինելու տենց բան: Այնպես, ինչպես ամբողջ աշխարհում ցանկացած փոփոխություն, դանդաղ է լինում, դժվար է լինում, մեր ցանկացածից ավելի դանդաղ ա լինում: Էդպես էլ լինելու է, բայց նորմալ, բնականոն կյանք եմ սպասում: Անցնող տարին նույն ձևի էր: Իհարկե, եղել են, շատ դրական փոփոխություններ են եղել, բացասական էլ են եղել, դրական էլ են եղել: Ի՞նչ եք սպասում: Էդ հարցերը որ տալիս եք, սպասում եք, որ ինչ-որ մեկը պիտի ոսկեզօծի՞ Ձեզ»,- ասաց նա:
