«Ես չգիտեմ այդ երկխոսությունը սկսվել է, վերջացել է, թե որ փուլում է, որովհետև ես չեմ ընդունում մի գործընթաց, որը գաղտնի է պահվում ժողովրդից»,- անդրադառնալով ԵԽԽՎ-ի՝ ՀԱԿ-իշխանություն երկխոսության մասին Սերժ Սարգսյանի հիշատակմանը՝ իր ելույթում կարծիք հայտնեց ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ, դաշնակցական Հրայր Կարապետյանը:
Նա նշեց, որ ժամանակին իրենց էլ էին կանչում երկխոսելու՝ ասելով, թե դրա արդյուքնում Հրանտ Մարգարյանին կամ Վահան Հովհաննիսյանին կազատեն բանտից:
Կարապետյանի խոսքերով՝ եթե նախագահի հայտարարության համաձայն պիտի գնան կոալիցիայի հետ խոսեն, ապա թող խոսեն. «Մենք՝ Դաշնակցությունը, բազմիցս ասել ենք, որ ողջունում ենք այնպիսի հարաբերություններ իշխանությունների և ընդդիմության ներկայացուցիչների միջև, որոնց հետևանքով կբացառվեն ներքաղաքական լարվածությունն ու վայրիվերումները, ինչը եղավ 2008 թ. մարտի մեկին»:
ՀՅԴ-ական պատգամավորը նկատեց, որ որևէ խանդի տեսարան այս հարցում ՀՅԴ-ի կողմից չկա. «Մենք չենք ընդունում գաղտնի ինչ-որ բանակցություններ, որոնք չգիտես՝ ինչի համար են, կամ այս բանակցությունները այլ քաղաքական ուժերի դեմ են և սա նույնպես դավադրություն է, կամ գաղտնի պայմանավորվածություններ են, որոնք հաստատ ժողովրդի շահերից չեն բխում»:
Ըստ Կարապետյանի՝ նման գաղտնի քայլերը միշտ ուղղված են եղել ժողովրդի դեմ կամ ժողովրդին հիմարեցնելու ուղղությամբ:
