Բրյուսելի Մատոնգե թաղամասը, որը մինչև վերջերս համարվում էր կեղտոտ, աղքատ ու վտանգավոր թաղամաս, զբոսաշրջիկների և բելգիացի երիտասարդների շրջանում դարձել է ամենասիրվածը: Այստեղ են կենտրոնացվել ամենաարտասովոր բարերը, գիշերային ակումբներն ու խանութները:
1960-ին Բրյուսել են տեղափոխվել կոնգոլեզցիներ, ովքեր ցանկացել են կրթություն ստանալ Բրյուսելում: Էլզաս Լորեյն փողոցում է գտնվել նրանց հանրակացարանը, որի շուրջ մի ամբողջ աֆրիկյան թաղամաս է ձևավորվել՝ հայտնում է Travel-ը:
Այսօր թաղամասի սիրտը վերջերս բացված Kuumba մշակույթի կենտրոնն է, որտեղ անցկացվում են աֆրիկյան գեղանկարչության ցուցահանդեսներ, ազգային պարի և երաժշտության դասընթացներ:
Մատոնգեի ամենահայտնի ռեստորանը Le Soleil D’Afrique-ն է: Այստեղ բելգիացիները գալիս են համտեսելու «մաֆե»՝ սենեգալյան հավով ուտեստ, և խմելու արևադարձային կոկտեյլներ: Afrikamali խանութում բելգիացիները կարող են գնել բնական աֆրիկյան կոսմետիկա, կերամիկական իրեր և նկարներ:
Այս ամենը թաղամասը դարձնում է Բրյուսելի տեսարժան վայրերից մեկն ու գրավում զբոսաշրջիկներին:
