Միջազգայնագետ Արմենակ Մինասյանցը և քաղաքագետ Ստեփան Գրիգորյանն «Առաջին լրատվական»- ի հետ զրույցում անդրադարձան Գերմանիայի կանցլեր Անգելա Մերկելի՝ Հայաստան կատարած այցին:
«Այցը թեև տարածաշրջանային է, բայց փաստը, որ Գերմանիայի կանցլերը այցելել է Հայաստան, շատ կարևոր է Հայաստանի համար, նաև Հայաստանի միջազգային հեղինակության համար:
Մերկելը, անդրադառնալով ղարաբաղյան խնդրին, հստակ ասաց, որ պետք է մթնոլորտը փոխվի, որ միայն նորմալ մթնոլորտում և խաղաղ ճանապարհով պետք է խնդիրը լուծվի: Մեզ համար դա կարևոր էր»,- նշեց Ս. Գրիգորյանը:
Մինասյանցի դիտարկմամբ՝ ներկայումս Գերմանիան փոխել է իր քաղաքականությունը. շատ ավելի թիրախավորված և տարանջատված քաղաքականություն է վարում յուրաքանչյուր հարավկովկասյան երկրի հանդեպ: Նրա խոսքով՝ Գերմանիայի աջակցությունը կարող է շատ օգտակար լինելՀայաստանի համար: «Գերմանիան Հայաստանի հետ համագործակցության բովանդակային այլ օրակարգ է վարում: Եվրոպական մայրաքաղաքներում Մերկելի այցը և Հայաստանում արած հայտարարությունները ստանալու են մեծ արձագանք: Եթե Գերմանիան դրական, վստահության մթնոլորտում է շփվում, դա դոմինոյի էֆեկտ է ունենալու, մեխանիկորեն տարածվելու է»:
Հարցին, թե վաղը կայանալիք Ալիև-Մերկել հանդիպումից ինչ կարելի է ակնկալել, Ս. Գրիգորյանը պատասխանեց. «Հիշեցնեմ՝ Գերմանիան մեզ աջակցում է նաև Խաղաղապահ ուժերը պահել և զարգացնել: Ղարաբաղյան խնդրի վերաբերյալ, կարծում եմ, որ Մերկելը Բաքվում չի շեղվի նրանից, ինչ ասաց Հայասանում. նա կասի, որ մթնոլորտը պետք է բարելավվի, և բանակցությունները պետք է վերսկսվեն: Բաքվում Մերկելը կխոսի կոնֆլիկտներից, ԼՂ հակամարտությունից, որը կլինի զսպիչ մեխանիզմ Ադրբեջանի համար՝ գոնե մոտ ժամանակներում պատերազմ չծավալելու: Կլինեն մեսիջներ, որ հակամարտությունը խաղաղ ճանապարհով պետք է լուծվի, կնշվի նաև, որ Գերմանիան պատրաստ է մեծացնել իր դերը կոնֆլիկտի լուծման հարցում»:
Մանրամասն՝ տեսանյութում: