Օգոստոսի 4-ին կմեկնարկի ֆուտբոլի Հայաստանի Բարձրագույն խմբի առաջնությունը, որին կմասնակցեն 9 թիմեր: Հիշեցնենք, որ Հայաստանի նախորդ առաջնությունում ելույթ ունեցան ընդամենը 6 թիմեր՝ «Փյունիկը», «Բանանցը», «Գանձասար-Կապանը», «Արարատը», «Շիրակը» և «Ալաշկերտը»: Մեկնարկելիք առաջնությանը կմասնակցեն 3 նոր թիմեր՝ «Արարատ-Արմենիան», «Արցախը» և «Լոռին»: Վերջին երկուսը նախորդ մրցաշրջանում ելույթ ունեցան Հայաստանի առաջին խմբի առաջնությունում՝ ապացուցելով, որ կարող են հաջող ելույթ ունենալ նաև բարձրագույն լիգայում: «Արարատ-Արմենիան», որը փաստացի Մոսկվայի «Արարատն» է, նախորդ մրցաշրջանում հանդես եկավ Ռուսաստանի երկրորդ դիվիզիոնում՝ զբաղեցնելով առաջին տեղը: Ռուսաստանի ֆուտբոլի միությունը, սակայն, «Արարատին» Ռուսաստանի առաջին դիվիզիոնում հանդես գալու լիցենզիա չէր տրամադրել: Ու հիմա ռուսաստանաբնակ գործարար Սամվել Կարապետյանի թիմը կխաղա Հայաստանի առաջնությունում:
Նշենք, որ վերջին շրջանում, ի տարբերություն մյուս ակումբների, «Արարատ-Արմենիան» բավական լուրջ համալրումներ է ունենում: Թիմի հետ արդեն պայմանագիր են կնքել մոտ 20 ֆուտբոլիստներ, որոնց թվում են՝ Հայաստանի ազգային հավաքականի ֆուտբոլիստներ Հրայր Մկոյանը, Ռոբերտ Դարբինյանը, Գոռ Մալաքյանը: «Արարատ-Արմենիայում» են Հայաստանի ազգային հավաքականի թեկնածուներ Արմեն Համբարձումյանն ու Արմեն Հովհաննիսյանը: Վերջինս ելույթ էր ունենում ուկրաինական «Զիրկայում», իսկ Համբարձումյանը՝ Վորոնեժի «Ֆակելում»: Անցյալ տարի Համբարձումյանը մի քանի անգամ հրավիրվել էր Հայաստանի ազգային թիմ, սակայն փաստաթղթերի հետ կապված խնդիրների պատճառով պաշտոնական հանդիպումների չի մասնակցել:
Նախօրեին «Արարատ-Արմենիայի» հետ պայմանագիր է կնքել Բուլղարիայի ազգային հավաքականի հարձակվող Իվալիո Դմիտրովը: Բուլղարիայի երիտասարդական հավաքականի նախկին պաշտպան Գեորգի Պաշովն էլ հայկական թիմի շարքերը համալրել էր ավելի շուտ: «Արարատ-Մոսկվայում» կխաղան նաև Ռուսաստանի առաջին դիվիզիոնը ներկայացնող թիմերից տեղափոխված բազմաթիվ բարձրակարգ՝ փորձառու ֆուտբոլիստներ:
Նշենք, որ թիմը համալրելու գործընթացը շարունակվում է, և չի բացառվում, որ առաջիկա օրերին «Արարատ-Արմենիայում» հայտնվեն այլ բարձրակարգ ֆուտբոլիստներ: Ակնհայտ է, որ այս թիմի առաջ խնդիր է դրվել նվաճելու Հայաստանի չեմպիոնի կոչումը և հանդես գալու Չեմպիոնների լիգայի խաղարկությունում: Որքանո՞վ է դա իրատեսական: Շատերի մոտ տպավորություն է ստեղծվել, որ «Արարատ-Արմենիան» մրցակցությունից դուրս է լինելու, քանզի ունի լուրջ ֆինանսական ռեսուրս՝ ի դեմս «Տաշիր» գրուպի:
Ժամանակը ցույց է տվել, սակայն, որ հապշտապ թիմ ստեղծելով՝ դժվար է կարճ ժամանակում բարձր արդյունք գրանցել: Ձմեռային տրանսֆերային պատուհանը մեզ համար նշանավորվեց Հայաստանի գործող չեմպիոն «Ալաշկերտի» համալրումներով: Գրեթե ամեն օր այս ակումբը հանդես էր գալիս նոր ֆուտբոլիստներ ձեռք բերելու մասին հայտարարություններով: Թվում էր, թե «Ալաշկերտը» գնում է հայկական ֆուտբոլի կտրվածքով բավական լուրջ կադրերի: Շատերը վստահաբար ասում էին, որ «Ալաշկերտը» իր կազմով չունի հավասարը մեր երկրում: 15-րդ տուրից առաջ «Ալաշկերտը» 30 միավորով գլխավորում էր մրցաշարային աղյուսակը՝ 6 միավորով գերազանցելով երկրորդ հորիզոնականում գտնվող «Գանձասար-Կապանին»: Տրանսֆերային պատուհանի ընթացքում «Ալաշկերտի» համալրումներից հետո այնպիսի տպավորություն է, որ չեմպիոնության հարցը ժամանակից շուտ լուծված է, բայց…
Առաջնության երկրորդ շրջանում «Ալաշկերտն» իր դժգույն խաղով զարմացրեց բոլորին: Ձմեռային տրանսֆերային պատուհանի ընթացքում ձեռք բերած լեգեոներներից կարելի է առանձնացնել միայն դարպասապահ Չանչարևիչին, որը մինչ օրս վստահ ելույթ է ունենում երևանյան թիմի կազմում: Մյուս լեգեոներները կարճ ժամանակահատվածում ուղղակի անհետացան: Միանգամից ուժեղ թիմ ստեղծելու ցանկությունն ու ձգտումը, այսպես ասած, հակառակ ռեակցիա տվեց:
Նման խնդրի առաջ են կանգնել նաև հայկական մի շարք այլ թիմեր: Նշենք նաև, որ «Արարատ-Արմենիայի» գլխավոր մարզիչը Ալեքսանդր Բաբայանն է, որը ֆուտբոլային աշխարհում հայտնի չէ: Կարծում ենք՝ պարզ է, որ Սամվել Կարապետյանի շռնդալից մուտքը հայկական ֆուտբոլ հնարավոր է այն էֆեկտը չունենա, որը սպասում են բազմաթիվ երկրպագուներ: Նշենք, որ այս ակումբի նկատմամբ ուշադրությունն ու հետաքրքրությունը բավական մեծ են: Մոսկվայի «Արարատի» ելույթներին հետևում էին մեծ թվով ֆուտբոլասերներ թե՛ Հայաստանից և թե՛ Ռուսաստանից: Երկրպագուները հույս ունեն, որ «Արարատ-Արմենիան» կկարողանա ձեռնոց նետել Ադրբեջանի Չեմպիոն «Ղարաբաղին», որը նախորդ մրցաշրջանում ելույթ ունեցավ Չեմպիոնների լիգայի խաղարկության եզրափակիչ փուլում: Թե երբ կհասունանա «Ղարաբաղին» երկրորդ պլան մղելու ժամանակը՝ դժվար է ասել:
Ակնհայտ է մի բան՝ այսօր մեր երկրում կա լուրջ հավակնություններ ունեցող ակումբ: Մնում է հուսալ, որ «Արարատ-Արմենիան» կարճ ժամանակում կկայանա որպես մարտունակ թիմ և չի արժանանա հայկական այն թիմերի ճակատագրին, որոնք ստեղծվելուց կարճ ժամանակ անց լուծարվեցին:
