«Բազմիցս նշել եմ, որ կուտակային կենսաթոշակային համակարգի «պարտադիր» բաղադրիչը ամենաբարդ ու ծանր լուծելի խնդիրը չէ, ես ավելի բարդ խնդիրների եմ առնչվել այս ոլորտում, որոնք խորքային լուծումներ են պահանջում, ինձ համար շատ կարևոր է, որ այդ հարցերի համակարգային լուծումներն արագ գտնենք: Ես ունեմ պատկերացում՝ ինչպես բարելավել ոլորտը և ինչ քայլեր անել: Այս առումով ինձ համար հեշտ չի եղել հրաժարական տալը,- «Առաջին լրատվական»- ի հետ զրույցում ասաց Աշխատանքի և սոցիալական հարցերի նախարար Մանե Թանդիլյանը:
Նրա խոսքով՝ Աշխատանքի և սոցիալական հարցերի նախարարությունը մեր պետության այցեքարտն է մեր քաղաքացիների աչքերում. «Ես ուզում եմ, որ մեր քաղաքացիներն իրենց զգան ՀՀ արժանապատիվ քաղաքացի: Մեր նախարարությունը նաև այդ հարցը լուծելու միջոց է»:
«Ես ոչ մի րոպե չեմ փոշմանել այն ճանապարհի համար, որ անցել եմ,- ընդգծեց նախարարը: – Իրականում նախարարի պաշտոնը և աթոռը գործիք է, նպատակը խնդիրներ լուծելն է, և եթե այն չի օժանդակելու խնդիրներ լուծելուն, ինձ պետք չէ: Ես շարունակելու էի օժանդակել խնդիրների լուծմանը՝ տարբեր ձևաչափերով: Ինձ համար կարևորը խնդիրները լուծելն է, որ ճանապարհով կկարողանամ, կգնամ այդ ճանապարհով:
Մանե Թանդիլյանն ընդգծեց, որ մնում եմ իր կարծիքին. Նրա խոսքով՝ պարտադիր «բաղադրիչը» այս պայմաններում՝ 30 տոկոս աղքատություն ունեցող երկրում ներդնելը ժամանակավրեպ է:
Նախարարը նշեց, որ նախագիծ է ներկայացնելու, որտեղ առաջարկներ կլինեն կուտակային կենսաթոշակային համակարգի վերաբերյալ:
Մանե Թանդիլյանը նշեց, որ իր որևէ քայլ ինքնանպատակ չէ: Նա նաև անդրադարձավ իր հրաժարականից հետո վարչապետ Նիկոլ Փաշինյանի հետ հանդիպմանը:
Մանրամասն՝ տեսանյութում:
