«Առաջին լրատվական»-ի զրուցակիցն է ԱԱԾ պետի նախկին տեղակալ Գուրգեն Եղիազարյանը։
– Պարոն Եղիազարյան, ԱԱԾ պետ Արթուր Վանեցյանը հայտարարել է՝ իրենք ինֆորմացիա են ստանում այն մասին, որ որոշ խմբեր փորձում են վնասազերծել իրեն և Նիկոլ Փաշինյանին։ Ըստ էության, իրենց անվտանգությունը կասկածի տակ է։ Դա ի՞նչ է նշանակում։ Արդյոք ճի՞շտ էր դրա բարձրաձայնումը։
– Ես մեկ ամիս առաջ եմ ասել։ Նիկոլ Փաշինյանը թիրախ է։ Նա հանցագործների թիրախն է։ Դրան իհարկե կավելանան նաև ԱԱԾ պետը և բոլոր նրանք, ովքեր կհամարձակվեն ձեռք բարձրացնել 10 տարվա տոտալ թալանի վրա։ Եթե ԱԱԾ պետն այդ մասին խոսել է, ուրեմն խոսել է փաստերով։ Իհարկե, ողջ օպերատիվ ինֆորմացիան չի ասել, բայց պետք է պատկերացնենք, որ ԱԱԾ պետը լրջագույն ինֆորմացիայի տեր է։ Ես համաձայն եմ նրա հետ, որ ինչու չէ՝ կարելի էր բարձրաձայնել այդ մասին։ Դա կարելի էր ենթադրել, որ այդպես էլ կլինի։ Իհարկե, այնտեղ նրբություններ կան։ Իմ տվյալներով՝ պետական պահպանությունն իրականացնող վարչության աշխատակիցները պարբերաբար գումարներ են ստացել։ Նրանք զուտ աշխատավարձով չեն աշխատել Սերժ Սարգսյանի մոտ։ Հիմա Նիկոլ Փաշինյանի գալուց հետո նրանք այլևս չեն ստանում, բնականաբար դժգոհություն կա, և դա պետք է մի տեղից դուրս գա։ Եվ դա կարող է լինել այնտեղ, որտեղից չեն սպասում։ ԱԱԾ պետի հայտարարությունը առ այն, որ իրենք թիրախավորված են, բնական է։ Այսօր Նիկոլի դիմաց կանգնած է մի բանակ՝ մինչև ատամները զինված։ Նա դուրս է եկել հիդրայի դիմաց գրեթե անզեն։ Իրենք սպասում են, որ Նիկոլը չլինի։ Նիկոլը չկա՝ խնդիրը լուծված է, իրենք միլիարդները պետք է վայելեն։ Պետք է հաշվի առնել, թե մենք ինչ ենք ցանկանում ազգովի։ Նա իրոք վտանգված է, լրջագույնս վտանգված է։
Հարցազրույցն ամբողջությամբ՝ տեսանյութում:
