Նախիջևանում՝ հայ-ադրբեջանական սահմանին կատարվող լարվածությունը շարունակում է ուշադրության կենտրոնում մնալ։ Մասնավորապես՝ քնանրկվում է այն փաստը, որ ադրբեջանական կողմը դիրքերն առաջ է բերել, որի հետևանքով Վայոց Ձորի Արենի գյուղը հայտնվել է նշանառության տակ։
Հետախույզ, ազատամարտիկ Վովա Վարդանովը «Առաջին լրատվական»-ի հետ զրույցում նշեց, որ կարիք չկա խուճապի մատնվելու, բայց և անգործության մատնվել պետք չէ։ Նրա խոսքով՝ ադրբեջանցիները ինժեներական աշխատանքներ են կատարել չեզոք գոտում։
«Թուրքերն արել են այն ինչ մենք ժամանակին անում և ուրախանում էինք։ Նրանք կարողացել են չեզոք գոտում ամրապնդվել, մինչև մերոնք կհասցնեին խանգարել։ Սովորական հրազենով չեն կրակի, խոշոր տրամաչափոփվ հնարավոր է։ Շատ ավելի վտանգված բնակչություն ունենք Նոյեմբերյանի շրջանում։ Քանի որ պատերազմը երկարատև է, մեկ մենք են հարված հասցնում, մեկ՝ նրանք»,- ասաց Վարդանովը։
Մեր զրուցակիցը վստահ է՝ գլխավոր շտաբը քայլեր ձեռնարկում է և բանակը ինչպես պետք է կպատասխանի։ «Թուրքերը հասկացել են, որ 2016-ի ընթացքում Մայր Հայաստանից մեծ օգնություն հասավ Արցախ, և թուրքը հասկացավ՝ Արցախը չի կարող բլից կրիգի օգնությամբ հաղթել, եթե չկտրի Հայաստանի երկու սնուցող օղակները՝ Վարդենիս Մարտակերտ և Գորիս Ստեփանակերտ ճանապարհը։ Դա իրենց շատ պետք է»։
Հիշեցնենք, որ ՀՀ Պաշտպանության նախարարության մամուլի խոսնակ Արծրուն Հովհաննիսյանը ֆեյսբուքյան իր էջում գրել էր, որ ՀՀ զինված ուժերը մշտական մարտական հերթապահություն ու աշխատանք է կատարում ՀՀ ողջ սահմանի երկայնքով։ «Նախիջևանյան հատվածում այդ աշխատանքներն ընթանում են բնականոն և ցանցում հնչեցված հատվածներում ևս կատարվում է մեծ մարտական ու ոչ միայն մարտական աշխատանք: Նշված գյուղերի բնակիչները դա լավ գիտեն, իրենց հետ տեղի են ունենում նաև ակտիվ քննարկումներ: Որևէ մեկ մարտական դիրքով կամ մարտավարական ճակատում (ջոկ-դասակ-վաշտ) եղած բարձունքով չի որոշվում մեր մարտունակությունն ու ունակությունը։ Մենք ևս ունենք բազում գերիշխող դիրքեր ու բարձունքներ: Հաճախ այստեղ հնչեցված հարցադրումներն ուղղակի խանգարում են մեր կողմից կատարվող աշխատանքների հաջող իրականացմանը: Խնդրում եմ ցուցաբերել զսպվածություն»,-ասված է գրառման մեջ:
