Վերաքննիչ քրեական դատարանում ավարտվեց Գևորգ Գևորգյանի գործով բերված վերաքննիչ բողոքների քննությունը:
Գործը քննվել է Սյունիքի մարզի ընդհանուր իրավասության դատարանում Լեռնիկ Աթանյանի նախագահությամբ:
33-ամյա Գևորգ Գևորգյանին մեղադրանք էր առաջադրվել շորթման ու տուժողի նկատմամբ բռնություն գործադրելու, ծեծելու համար՝ ՀՀ քրեական օրենսգրքի 182 հոդվածի 1-ին մասով և 118 հոդվածով:
Տուժողը Գևորգի հարևանուհի Հերմինեն է, ով զբաղվում է մարմնավաճառությամբ:
Հերմինեն հաղորդում է տվել, թե հարևան Գևորգը, իմանալով, որ ինքը զբաղվում է մարմնավաճառությամբ, 2012 թվականի հոկտեմբերից սկսած՝ պարբերաբար իրեն սպառնացել է, թե խնդիրներ կառաջացնի, եթե ինքը նրան կանխիկ գումար չտա:
Ինքը վախեցել ու պարբերաբար Գևորգին տվել է 3-ից 5 հազար դրամ, լիցքավորման քարտեր, ոսկե մատանի:
2013 թվականի հունվարի 13-ի երեկոյան Գևորգը մտել է իր բնակարան, հայհոյել, ձեռքերով ու ոտքերով հարվածներ հասցրել իր մարմնի տարբեր մասերին, ծեծել է նաև այդ պահին իր տանը գտնվող ընկերուհուն:
Ընդհանուր իրավասության դատարանում Գևորգ Գևորգյանը շորթման մասով իրեն մեղավոր չի ճանաչել, իսկ ծեծի մասով մեղավոր է ճանաչել մասնակիորեն:
Ընդհանուր իրավասության դատարանը եզրակացրել է, որ Գևորգ Գևորգյանի արարքում բացակայում են շորթման՝ ՀՀ քրեական օրենսգրքի 182 հոդվածի 1-ին մասով նախատեսված հանցագործության հատկանիշները, և այդ մասով արդարացրել է Գևորգ Գևորգյանին:
ՀՀ քրեական օրենսգրքի 118 հոդվածով Գևորգ Գևորգյանը մեղավոր է ճանաչվել ու դատապարտվել 100 հազար դրամ տուգանքի: Գևորգյանն անհապաղ ազատ է արձակվել դատարանի դահլիճում:
Դատավճռի դեմ վերաքննիչ բողոքներ էին բերել մեղադրողը և տուժող Հերմինեն:
Մեղադրողը պահանջել էր Գևորգյանին մեղավոր ճանաչել նաև շորթման մասով, նրան վերջնականապես դատապարտել 4 տարի ազատազրկման և 100 հազար դրամ տուգանքի:
Տուժող Հերմինեի բողոքի պահանջը մեղադրողի բողոքին համահունչ էր: Հերմինեն պահանջում էր նաև, որ Գևորգից հօգուտ իրեն բռնագանձեն շորթված բոլոր գումարները:
Իր բողոքը հիմնավորելու համար Հերմինեն Կապանից Երևան էր բերել իր երկու դեռատի աղջիկներին, ովքեր գործով վկաներ էին:
Աղջիկները Երևան էին հասել վկայություն տալու, թե իրենց մոր՝ մարմնավաճառ լինելու հանգամանքով պայմանավորված՝ հարևան Գևորգը գումարներ էր շորթել նրանից:
Հերմինեն վերաքննիչ դատարանի հարցին ի պատասխան ասաց, թե իրեն զանգել են, կանչել, ինքը «դրսերն» է գնացել ու էնտեղից վերադարձել արդեն որոշակի գումարով, տանը «գործ» չի արել, շենքի բնակիչներին չի անհանգստացրել:
Վերաքննիչ քրեական դատարանը մերժեց մեղադրողի և տուժողի վերաքննիչ բողոքները՝ եզրակացնելով, որ գործով ապացուցված չէ ամբաստանյալի կողմից հարևան մարմնավաճառուհուց շորթում կատարելը:
Այդ առումով ընդհանուր իրավասության դատարանի դատավճիռը գնահատվեց հիմնավոր և թողնվեց անփոփոխ: Միաժամանակ վերաքննիչ դատարանը համաներում կիրառեց և Գևորգ Գևորգյանի վերաբերյալ ՀՀ քրեական օրենսգրքի 118 հոդվածով, որով նա 100 հազար դրամ տուգանքի էր դատապարտվել, քրեական գործի վարույթը կարճեց, Գևորգյանի նկատմամբ էլ քրեական հետապնդումը դադարեցրեց:
