Հայաստանում տեղի ունեցածը, փաստորեն, քաղաքացիական Սառը պատերազմի ավարտ էր, որը տևում էր 20 տարի: Այդ մասին «Առաջին լրատվական»-ի հետ զրույցում նշեց հրապարակախոս Արա Նեդոլյանը:
Նրա խոսքերով` այդ Սառը պատերազմի բնույթն այն էր, որ իշխանությունը լեգիտիմ չէ, և մարդիկ բռնի ձևով պահում են իշխանությունը:
«Իհարկե, այս ամենի տրամաբանական և օրինական ավարտը պետք է լինեն ընտրությունները: Քանի դեռ ընտրություններ չկան, մենք մի փոքր մտահոգիչ վիճակի մեջ ենք և կարող ենք այդ քաղաքացիական պատերազմի շարունակության դրսևորում տեսնել՝ ՀՀԿ-ի ռևանշի ձևով: Այդ հարցը պետք է շուտափույթ լուծվի, և քաղաքացիական պատերազմը դրանով կավարտվի»,- ընդգծեց Նեդոլյանը՝ հավելելով, որ հետո սկսվում է բովանդակային խնդիրների լուծումը․«Եթե ամեն բան նորմալ գնա, առաջիկա կես տարին իրավիճակի նորմալիզացիայի շրջանն է լինելու: Այսինքն՝ պետական տեսչությունները դադարում են լինել ժողովրդին զսպելու մեխանիզմներ և փորձում են իրենց գիտակցել որպես զարգացման գործակալություններ: Հետո գալիս է հարցը, թե որն է զարգացումը, ու դրանից հետո կսկսվի արմատական փոփոխությունների շրջան, կամ չի սկսվի: Ես հուսով եմ, որ կսկսվի»:
Ամբողջությամբ՝ տեսանյութում։