Տորոնտոյի քաղաքապետ Ռոբ Ֆորդն, ամենայն հավանականությամբ, փորձել է գնել տեսանյութը, որում նա պատկերվել է թմրանյութ օգտագործելու պահին: Ինչպես հայտնում է Associated Press-ը, նման եզրակացություն կարելի է անել թմրադիլերներին ոստիկանների հետապնդման նյութերի հիման վրա:
Հանցավոր խմբավորման ենթադրյալ անդամների միջև բանակցությունների ձայնագրություններում լսվում է, թե ինչպես են նրանք քննարկում իրենց կապերը կանադական խոշոր քաղաքի քաղաքապետի հետ և թմրանյութերի հանդեպ նրա կիրքը: Կասկածյալներից մեկն ասում է, որ Ֆորդն իրեն 5000 դոլար և ավտոմեքենա է առաջարկել տեսանյութի համար, սակայն մերժվել է: Չարագործը մտադիր էր քաղաքապետից ավելի մեծ գումար ստանալ՝ 150 հազար դոլար:
Թմրադիլերների գաղտնալսման ձայնագրությունները հրապարակվել են դեկտեմբերի 4-ին: Կասկածյաները քննարկել են նաև իրենց ունեցած լուսանկարները, որոնցում Ֆորդը ոչ միայն բյուրեղացված կոկաին է ծխել, այլև հերոին օգտագործել: Չարագործներից մեկը մտադրություն է հայտնել դրանցիցի մեկը տեղադրել Instagram-ում:
Նոյեմբերին Ֆորդը խոստովանել էր, որ բյուրեղացված կոկաին է օգտագործել, չնայած մինչ այդ հերքում էր: Տորոնտոյի քաղաքային խորհուրդը չի կարողացել հասնել քաղաքապետի հրաժարականին, սակայն սահմանափակել է նրա լիազորությունները՝ հասցնելով միայն ներկայացուցչական գործառույթների: Ֆորդն այդ առնչությամբ վրդովմունք է արտահայտել և իր հակառակորդներին խոստացել հաջորդ ընտրություններում վճռորոշ պայքար:
