Արագածոտնի մարզպետ Սարգիս Սահակյանը «Առաջին լրատվական»-ին ասաց, որ առանձնակի տպավորված է տնտեսական ֆորումից, իր բոլոր սպասելիքները գերազանցվել են ինչպես Պուտինի այցից, այնպես էլ ֆորումի աշխատանքներից: Նա Լենինգրադի մարզի ղեկավարի հետ համաձայնություն է ձեռք բերել, որ այս տարի ևս մի քանի ուսանողներ մեկնեն այնտեղ ուսանելու, որոնց ուսման վարձը կվճարեն իր ռուս գործընկերները: «Այդ հանդիպման ժամանակ պայմանավորվածություն ձեռք բերվեց, որ այս տարի ևս մեր մարզի երեխաները շարունակեն իրենց ուսումնական պրոցեսները լենինգրադյան ուսումնական հաստատություններում: Նախատեսվում է, որ հաջորդ տարի մոտ 10 երեխա կմեկնի այնտեղ ուսանելու»,- ասաց մարզպետը: Նրա խոսքով, բացի դա` պայմանավորվածություն է ձեռք բերվել խորացնել նախկինում կնքված պայմանագրի կետերը:
«Մեր մարզը համարվում է գյուղատնտեսական մարզ, մարզի պտուղը, բանջարեղենը, արտադրված հյութերը, գինիները հետաքրքրում են իրենց, և կփորձենք իրենց Առևտրաարդյունաբերական պալատի հետ պայմանավորվածության շնորհիվ մեր արտադրանքը իրացնել Լենինգրադի մարզում: Գալող տարի մեր մարզի արտադրողները լուրջ հաջողություններ կունենան իրենց ապրանքը իրացնելու հարցում»,- հավելեց մարզպետը:
Սահակյանը, ով Պուտինի այցի ժամանակ եղել է և Գյումրիում, և Երևանում, չէր տեսել որևէ բողոքի ակցիա և չգիտեր 100-ից ավելի բերման ենթարկվածների մասին, իսկ այդօրինակ բողոքներին, կարծում է, որ պետք չէ լուրջ վերաբերվել: «Չկա տենց բան, ես ոչ մի տեղ ժողովրդի կուտակում, փակ ճանապարհ չեմ տեսել, որևէ խոչընդոտ չեմ տեսել, ու եթե մի 100 հոգի մարդ իրենց կարծիքն է հայտնում, չի կարելի մի ամբողջ երկրի ճակատագիր կապել այդ 100 հոգու տեսակետի հետ: Մի հատ դրանց հարցրեք` էսքան վախտ ինչ են արել էս երկրի համար, հայոց պետության համար, որ հիմա էլ կարծիք են ուզում հայտնեն: Ինչ վատ ա Մաքսային միությունը, չեմ հասկանում»:
Վայոց ձորի մարզպետ Էդգար Ղազարյանն էլ տնտեսական համաժողովի ժամանակ պայմանավորվածություն է ձեռք բերել Արխանգելսկի մարզի հետ, իսկ ավելի վաղ համաձայնագիր է ստորագրվել Նիժեգորոդի մարզի հետ: Մարզպետի խոսքով, որոշակի պայմանավորվածություններ են ձեռք բերվել մի քանի ուղղություններով՝ գիտատեխնիկական, տնտեսական, կրթական, մշակութային ոլորտների, տուրիզմի զարգացման: «Մեր ռուս գործընկերներին, մասնավորապես, հետաքրքրում են Վայոց ձորի դիտարժան վայրերը, Ջերմուկ քաղաքը` որպես դեռևս ռուսական շրջանակներից հայտնի ջրաբուժական քաղաք: Նրանց շատ է հետաքրքրում նաև արտադրված գինին, մթերքները, իսկ մեզ՝ ծովամթերքները, փայտանյութը, որը Հայաստանում մեծ պահանջարկ ունի»:
Ղազարյանի խոսքով` Պուտինի այցը կամրապնդի պետությունների միջև գոյություն ունեցող կապը, հայ-ռուսական հարաբերությունները, որից կշահեն երկու պետությունները և ժողովուրդները: Էդգար Ղազարյանն էլ չցանկացավ գնահատական տալ Պուտինի այցի օրը մի քանի տասնյակ քաղաքացիների բերման ենթարկելու ոստիկանական գործողություններին: Դա իր իրավասությունների շրջանակից դուրս համարեց: Պուտինի դեմ բողոքի ակցիաներ էլ մարզպետը չէր տեսել: Ասաց՝ զբաղված է եղել կազմակերպչական հարցերով և ոչնչից տեղյակ չէ ու չի կարդացել:
Գեղարքունիքի մարզպետ Ռաֆիկ Գրիգորյանը դեռ չէր ճանապարհել իր ռուս գործընկերներին: Նրանք մարզ են գնացել, պայմանավորվածություններ և համաձայնագիր է կնքվել տուրիզմի զարգացման և մի քանի այլ ոլորտների շուրջ և այսօր նոր միայն հյուրերը կմեկնեն: Նա ևս դրական գնահատեց Պուտինի այցը: «Ցանկացած այց հետագայում տալիս է իր արդյունքը»,- ասաց Գրիգորյանը: Մարզպետը համակարծիք չէ, որ Պուտինին դիմավորելիս մարդկանց պարտադրաբար էին բերել, ինքն այնտեղ է եղել, բոլորին էլ ճանաչում է, և ոչ ոք, նրա խոսքով, պարտադրաբար չէր եկել: Ինչ վերաբերում է ձերբակալություններին, ապա Գրիգորյանն ասաց, որ ինքը դեմ է անհիմն ձերբակալություններին, բայց նաև կողմնակից է, որ նրանք, ովքեր խախտում են կարգը և օրենքը, պետք է պատժվեն: Կարծում եք` երեկ 100-ից ավել մարդ օրե՞նք էր խախտել՝ հարցրեցինք նրան. «Եթե նրանց տարել են ոստիկանություն, կարծում եմ, կուսումնասիրեն և կպարզեն ով է մեղավոր»:
