Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ այսօր տեղի ունեցավ Կարեն Ավետիսյանի գործով դատական նիստ:
Ըստ մեղադրանքի՝ 43-ամյա Կարեն Ավետիսյանը 2013 թվականի հուլիսի 22-ին, ժամը 13-ի սահմաններում գտնվել է կնոջ մորաքրոջ հարևանուհի Ռուզաննայի տանը:
Նա իր մոտ եղած մալուխի գործադրմամբ, ձեռքերով ու ոտքերով առանձին դաժանությամբ հարվածել է տանտիրուհու մարմնի տարբեր մասերին, պատճառել միջին ծանրության վնաս՝ գոտկային չորրորդ ողի փակ կոմպրեսիոն կոտրվածքի, պարանոցի շրջանի, բազկի, ոտնաթաթի արյունազեղումների ու արյունահավաքների տեսքով:
Դատական նիստին չէր ներկայացել տուժողը: Ռուզաննան դեռ սեպտեմբերին դիմում էր գրել Շենգավիթ վարչական շրջանի դատախազին և ընդհանուր իրավասության դատարանի նախագահին՝ հայտնելով, որ ինքը նաև ԱՄՆ քաղաքացի է, մեկնում է այնտեղ, դատական քննությանը ներկա գտնվել չի կարող, սակայն բողոքում է Կարեն Ավետիսյանի դեմ և խնդրում է, որ դատարանը նրան պատժի օրենքի խստությամբ:
Կողմերի կարծիքները լսելով՝ նախագահողը որոշեց նիստը շարունակել տուժողի բացակայության պայմաններում:
Նիստի սկզբում Կարեն Ավետիսյանը միջնորդեց իր գործը քննել արագացված կարգով՝ հայտնելով, թե իրեն լիովին մեղավոր է ճանաչում առաջադրված հոդվածով՝ ՀՀ քրեական օրենսգրքի 113 հոդվածի 2-րդ մասի 5-րդ կետով:
Մեղադրողն առարկեց արագացված կարգ կիրառելու դեմ՝ պատճառաբանելով, թե արարքի որակման հետ կապված՝ ցանկալի է, որ գործը քննվի ընդհանուր կարգով:
Այսօր հարցաքննվեցին վկաները:
Առաջին երկու վկաները Ռուզաննայի հարևանուհիներն էին, ովքեր դեպքից անմիջապես հետո գնացել էին նրա բնակարան:
Առաջին հարևանուհին նշեց, որ դեպքի օրը ինքը տուն էր վերադառնում: Շենքի մուտքի մոտ հանկարծ «անմարդկային» ճիչեր է լսել: «Գոռոցներն այնպիսին էին, կարծես մեկին մորթում, սպանում էին»:
Առաջին հարկում բնակվող կինը սկսել է դանդաղ բարձրանալ աստիճաններով, որպեսզի հասկանա, թե որ բնակարանից են գալիս ճիչերը:
Չհասած երրորդ հարկի աստիճանահարթակին՝ նա տեսել է, որ բացվեց երրորդ հարկի բնակարաններից մեկի դուռը, և վազելով ցած է իջնում մի տղամարդ:
Վերջինիս կինը ճանաչում էր, նա նույն՝ երրորդ հարկի մեկ այլ բնակարանատիրոջ քրոջ փեսան էր՝ ներկայումս ամբաստանյալ Կարեն Ավետիսյանը:
Հարևանուհին ենթադրել է, թե տղամարդն օգնության է վազում, ու հարցրել է՝ ի՞նչ է պատահել: Տղամարդը հպանցիկ ասել է՝ չգիտեմ, ու վազելով հեռացել է:
Հարևանուհին բարձրացել է ու բաց դռնից ներս նայելով՝ տեսել է բնակարանատիրուհի Ռուզաննային, ով ընկած էր միջանցքում և շարունակում էր աղեկտուր ճչալ:
Կինը տեսել է, որ Ռուզաննայի պարանոցին մալուխ է փաթաթված, կողքին էլ դանակ է ընկած:
Ռուզաննայի մարմնի արտաքին զննությամբ համոզվել է, որ դանակի հարվածի հետք չկա, ու սկսել է հանգստացնել նրան:
«Նա սարսափի ու շոկի մեջ չէր ճանաչում անգամ, թե ով է իրեն մոտեցել: Շարունակում էր գոռալ: Ես ասի՝ մարմնիդ հարվածի հետք չկա, մի վախենա: Նա մի փոքր սթափվեց, հարցրեց՝ ճի՞շտ, ու մի քիչ հանգստացավ: Նրա ճակատը վնասված էր, պարանոցի ու ողնաշարի սուր ցավեր ուներ»:
Հարևանուհին Ռուզաննայի պարանոցից հանել է մալուխը, որը կարմիր հետքեր էր թողել:
Աղմուկի վրա հավաքված հարևանուհիները տուժածին օգնել էին, որ վեր կենա:
Ռուզաննան վերջերս էր Հայաստան եկել: Նա մշտապես բնակվում է ԱՄՆ-ում: Երևանում նա հայրական տուն ունի, որտեղ էլ գտնվել է դեպքի օրը: Կարենը նրան ճանաչում էր, գիտեր, որ Ռուզաննան Ամերիկայից է եկել:
Ըստ քրեական գործի նյութերի ու վկաների ցուցմունքների՝ Ռուզաննան Եհովայի վկա է:
Փոքր-ինչ սթափվելուց հետո, մինչև շտապօգնության ու ոստիկանության գալը, Ռուզաննան պատմել է, որ իր դուռը թակել է հարևանուհու քրոջ փեսա Կարենը: Ինքը դուռը բացել է: Կարենն ասել է, թե կնոջ մորաքրոջ տնից պետք է գործիքներ վերցնի, բայց նրանց դուռը փակ է, իր հեռախոսն էլ լիցքաթափվել է թարսի պես: Խնդրել է թույլ տալ, որ զանգահարի:
Ռուզաննան ներս է հրավիրել Կարենին: Վերջինս սկսել է զանգահարել բարեկամին:
Ռուզաննան հայկական սովորությամբ՝ սուրճ է հյուրասիրել: Զրուցել են: Կարենը նստել է մոտ երկու ժամ:
Հետո Ռուզաննան ասել է, որ պետք է բժշկի գնա, երկար սպասել չի կարող: Նա վերցրել է հեռախոսը, որ ինքը զանգի Կարենի բարեկամին: Այդ ժամանակ կինը մեկ էլ այն է զգացել, որ հեռախոսը ձեռքից թռավ, և ուժեղ հարված իջավ ծոծրակին:
Առաջին հարվածից հետո՝ հետագայում պատմել է Ռուզաննան, ինքն ուշաթափվել է: Երբ ուշքի է եկել, զգացել է, որ պարանոցին լար է փաթաթված: Ձեռքը մտցրել է լարի արանքը, թույլ չի տվել, որ լարն ամուր ձգվի:
Կարենը ուժգին հարվածներ է հասցրել ձեռքերով ու ոտքերով, Ռուզաննային քարշ է տվել միջանցք: Ռուզաննան, իր պատմելով, մտածել է՝ տեսնես այս մարդն ինչո՞ւ է ինձ հարվածում, ինչո՞ւ է ինձ սպանում:
Ռուզաննան սկսել է աղեկտուր ճչալ: Նրա գոռոցներից անակնկալի գալով՝ Կարենը գնացել է խոհանոց, դանակ վերցրել, բայց մոտենալով՝ դանակի շեղբով չի խփել, հնարավոր է կոթով խփել է տանտիրուհու ճակատին:
Քանի որ Ռուզաննան անընդմեջ գոռում էր, մուտքում էլ արդեն դռների ու քայլերի ձայներ էին լսվում, Կարենը վախեցել է, դանակը գցել հատակին՝ Ռուզաննայի կողքը, դուռը բացել ու վազելով հեռացել:
Երբ Ռուզաննան փոքր-ինչ սթափվել է, հարևանուհիներին խնդրել է դուրս գալ տնից: Փակել է դուռը: Հարևանուհիները մնացել են դռան առաջ:
Երբ Ռուզաննան ուշացել է, նրանք անհանգստացել են: Կանանցից մեկը ներս է մտել, տեսել, որ Ռուզաննան ննջարանում ստուգում է պահարանի դարակները:
Հետո նա հարևանուհուն բացատրել է, որ ինքը գումար չունի, ոսկեղեն ունի, ստուգում էր՝ ոսկեղենը տեղո՞ւմ է: Ոսկեղենը տեղում էր եղել, բնակարանից ոչինչ հափշտակված չէր:
Ռուզաննան հարևանուհուն ասել է, թե Կարենն իրենից ոչինչ չէր պահանջել հարվածելու ընթացքում:
Բայց Ռուզաննան ենթադրել է, որ Կարենը, մտածելով, թե ինքը Ամերիկայից է եկել, գումար կունենա, եկել էր, որ թալանի: Սակայն չի կարողացել անմիջապես սպանել, իր բարձրացրած աղմուկից էլ վախեցել է ու փախել:
Հարձակումից հետո Ռուզաննան իր մտերմուհուն զանգահարել ու ասել է, թե սարսափելի վիճակում է, իր վրա հարձակվել են, սպանության փորձ են կատարել:
Այս վկա կինը դատարանում ասաց. «Ռուզաննայի տեսքը սարսափելի էր: Պարանոցի վրա երկու գծով երևում էին լարի հետքերը, աչքերը դուրս էին պրծել, ճակատը, դեմքը վնասված էին, ողնաշարի ցավերից չէր կարողանում շարժվել: Ռուզաննան ասաց, որ երևի ցանկացել են իրեն թալանել, բայց չեն իմացել, որ ինքը փող չունի, աշխատավարձը կոպեկ-կոպեկ հավաքել էր ու եկել Երևան՝ բուժվելու»:
Այս վկան հայտնեց, որ Ռուզաննան ներկայումս Ամերիկայում էլ բուժվում է, ողնաշարի ողի կոտրվածքը լրիվ չի ապաքինվել, նա չի կարողանում աշխատել, իսկ դա նշանակում է, որ եթե չապաքինվի, կարող է կորցնել աշխատանքը ու մնալ փողոցում:
Այսօր վկայություն տվեց նաև ամբաստանյալ Կարեն Ավետիսյանի կինը: Նա ամուսնուն բնութագրեց որպես համբերատար, համեստ մարդու, ով երբեք կնոջ վրա ձեռք չի բարձրացրել, երեխաներին սիրում է քնքշորեն:
Կինն ասաց, որ ինքը մինչև հիմա շոկի մեջ է: Կալանքի տակ չգտնվող ամուսինն այս թեմայով տանը չի խոսում, և կինը դեռ լիովին չի պատկերացնում, թե ինչը կարող էր Կարենին այդպես հունից հանել:
Կինն անհամարձակ ենթադրություն արեց, որ ամուսինն ու Ռուզաննան երևի խոսել են հոգևոր թեմաներից, վերջինս խոսել է Եհովայից, ամուսինն էլ կորցրել է համբերությունը և հարձակվել նրա վրա…
Միաժամանակ կինը հայտնեց, որ դեպքի պահին ամուսինը 600 հազար դրամ պարտք ուներ…
Ի՞նչ էր տեղի ունեցել իրականում:
Նախաքննության ընթացքում, ըստ երևույթին, Կարենի անակնկալ հարձակման բուն դիտավորությունը հստակորեն չի պարզվել: Նրան մեղադրանք է առաջադրվել ըստ հետևանքի՝միջին ծանրության վնաս պատճառելու համար:
Բայց տուժողի ենթադրությունները, որոնք հայտնել է հարևաններին, մտերիմներին, եղել է այն, որ իր վրա հարձակում է եղել «թալանի» նպատակով…
Տուժողի նախաքննական ցուցմունքները և գործում առկա մյուս ապացույցները կհետազոտվեն հաջորդ դատական նիստին: Դրանից հետո ցուցմունք կտա ամբաստանյալը: Միգուցե հստակ կբացատրի, թե ինչ է տեղի ունեցել հուլիսի 22-ին Ռուզաննայի բնակարանում, ուր ինքը մտել էր զանգելու պատրվակով:
