Վալանսը Ֆրանսիայի Տրոմ նահանգի այն գողտրիկ քաղաքն է, որի բնակչության մինչև 10%-ը կազմված է հայերից, և որը նախորդ քաղաքապետի՝ Պատրիկ Լաբոնի կողմից կոչվել է «Հայոց մայրաքաղաք՝ Ֆրանսիայում»: 7-8 հազար հայ բնակչություն ունեցող «հայկական» այս քաղաքը ներկայումս գտնվում է կատարյալ հեղափոխության շրջանում, և եթե այդպես շարունակվի, բնավ զարմանալի չի լինի, եթե առաջիկայում այն կոչվի «թուրքական քաղաք»: Այս մասին տեղեկացնում է ֆրանսիական «Յառաջ» պարբերականը:
Այս երևույթը չի կարելի վերագրել պատահականությանը, քանզի ակնհայտ է թուրքական հյուպատոսարանի և ֆրանսթուրքական ընկերակցությունների՝ այդ ուղղությամբ կատարած աշխատանքը: Ակնհայտ է, որ թուրքական կողմը դիմում է լուրջ և ծրագրված քայլերի՝ հայաշատ բոլոր շրջանները բնակեցնելով թուրքերով՝ այդ ոստիկանների մեջ հայերի հակակշիռը չեզոքացնելու և ինչու չէ՝ այնուհետև թուրքական հակակշիռ հաստատելու, թուրքական գաղափարախոսությունը տարածելու հեռանկարներով: Նման երևույթ է դիտարկվում նաև փարիզյան շրջանի Ալֆորվիլ քաղաքում, որտեղ օր օրի ավելի է մեծանում թուրքական համայնքը:
Այս հանգամանքներում նոյեմբերի 23-ին Վալանսի արհմիությունների տունը հրավիրել է ժողով, որը կազմակերպել են Ֆրանսթուրքական բարեկամության միությունը և Ժողովրդավար թուրքերի միությունը՝ օրակարգում դնելով թուրքերի քվեները քաղաքապետական ընտրություններին: Ժողովին մասնակցել են Վալանսի փոխքաղաքապետ Պիեռ-Ժան Վերեն (ընկերվարական), Ֆրանկ Սուլինյակը (UMP) և Օլիվիա Կաֆան (MoDem):
Վալանսում ներկայիս թուրքական համայնքի բնակիչների թիվը հատում է 4.000-ի սահմանը, բայց դրանց մի մասը քրդեր են:
