Երկրների միջև ցանկացած համագործակցություն պետք է իրականացվի փոխադարձ հարգանքի պայմաններում, սակայն ԱՄՆ ներկայիս վարչակազմը ցույց է տալիս, որ անլուրջ է վերաբերվում իր միջազգային պարտավորություններին։ Այս մասին հայտարարել է Իրանի արտաքին գործերի նախարար Մոհամադ Ջավադ Զարիֆը։
Նրան հարց էին տվել ԿՀԲ–ի տնօրեն Մայքլ Պոմպեոյի հետ աշխատելու պատրաստակամության մասին, այն դեպքում, եթե նրան վերջնականապես նշանակեն պետքարտուղարի պաշտոնում։ «Յուրաքանչյուր ազդանշան, որ ուղարկում է ԱՄՆ–ն՝ նշանակումներ, հայտարարություններ, ասում է մեզ և միջազգային հանրությանը, որ Միացյալ Նահանգները լուրջ չեն վերաբերվում իրենց միջազգային պարտավորություններին»,– ասել է իրանցի դիվանագետը։
«Ցանկացած միջազգային փոխգործակցություն փոխադարձ հարգանք է պահանջում։ Մետք պետք է սպասենք և տեսնենք»,– ասել է Զարիֆը՝ խոսելով նոր պետքարտուղարի հետ համագործակցության մասին։ Նա նաև նշել է, որ մինչ այդ երբևէ չի հանդիպել Պոմպեոյին։