Սերժ Սարգսյանի և Նիկոլ Փաշինյանի հանդիպումը տևել է մի քանի րոպե: Նախատեսվածի նման կողմերը ժամը 10:00-ին եկել էին «Արմենիա Մարիոթ» հյուրանոց: Հանդիպումը կազմակերպվել էր լրագրողների ներկայությամբ: «Ուրախ ենք, որ արձագանքեցիք խոսելու իմ բազմաթիվ կոչերին: Թեև ես լավ չեմ պատկերացնում, թե տասնյակ լրագրողների ներկայությամբ ինչքան կարող ենք բանակցել, այդուհանդերձ ուրախ եմ»,- այս խոսքերով է հանդիպումը սկսել վարչապետ Սարգսյանը: Ի պատասխան նրա՝ Փաշինյանը նշել է, որ այստեղ թերևս կա թյուրըմբռնում, քանի որ նա չի եկել երկխոսության, այլ եկել է քննարկելու Սերժ Սարգսյանի հրաժարականի և իշխանության խաղաղ փոխանցման հարցը:
«Դա բանակցություն չի, դա երկխոսություն չի: Դա ուղղակի ուլտիմատում է, շանտաժ պետությանը, օրինական իշխանություններին: Դուք չեք գիտակցում պատասխանատվության աստիճանը, դուք չեք քաղել դասեր մարտի 1-ից: Եվ եթե պետք է խոսել այդ տոնով, ապա ինձ մնում է միայն ևս մեկ անգամ խորհուրդ տալ, որ գաք օրինական դաշտ և ընդհանրապես տրամաբանական գործողությունների սահման: Հակառակ պարագայում ողջ պատասխանատվությունը ձեր վրա է»,- հայտարարել է Սարգսյանը:
Ավելի ուշ` հյուրանոցից դուրս գալուց հետո, Նիկոլ Փաշինյանը հայտարարել է, որ «Սերժ Սարգսյանը գտնվում է անհավասարակշիռ, հիստերիկ վիճակում, և ուժային կառույցները պետք է գիտակցեն, որ ներվային վիճակում գտնվող մարդու հրամանները չպետք է կատարել»:
Ինքնին հասկանալի է, որ փոխադարձ այս հռետորաբանությունը որևէ աղերս չունի երկխոսության, անգամ` քաղաքականության հետ:
Սպասման գիշերին հաջորդել է տագնապների առավոտը:
Պատահական չէ, որ բանակցությունների տապալմանը հաջորդել են դրամատիկ իրադարձությունները: Փաշինյանը Սարգսյանի հետ հանդիպման ժամանակ դրսևորեց, ըստ էության, վերջնագրային մարտավարություն, ինչը առիթ տվեց, որ վարչապետը դադարեցնի հանդիպումը և իշխանությունը դիմի կոշտ գործողությունների: Էրեբունի վարչական շրջանում ոստիկանները կիրառեցին հատուկ միջոցներ, հնչեցին կրակոցներ, բերման ենթարկվեցին պատգամավորներ Նիկոլ Փաշինյանը, Սասուն Միքայելյանը և Արարատ Միրզոյանը:
Տեղի ունեցածը փոխադարձ անտագոնիզմի դրսևորում է, սակայն դեռ ամեն ինչ կորսված չէ և ճգնաժամը դեռ կարելի է հանգուցալուծել բանակցությունների միջոցով:
Հիմա առավել ևս` բոլոր հանրային դեմքերը, Ամենայն Հայոց կաթողիկոսը, կշիռ ունեցող գործիչները պետք է հասկանան, որ Սերժ Սարգսյանը կամ Նիկոլ Փաշինյանն այլևս չունեն իրենց աջակցության, գովեստի կամ շողոքորթման կարիքը: Պաշտպանության կարիք ունի բացառապես Հայաստանը, խաղաղ և արժանապատիվ կյանքի կարիք ունեցող մեր հասարակությունը: Նիկոլ Փաշինյանը և Սերժ Սարգսյանը պարտավոր են մտածել և ուղիներ փնտրել` նորից հանդիպելու, կոմպրոմիսների գալու համար: Երևանում այսօր առավոտյան տեղի ունեցած դրամատիկ իրադարձությունները խիստ անցանկալի էին, սակայն դեռ չեն փակել ճգնաժամի հանգուցալուծելու քաղաքակիրթ ճանապարհը:
Երկխոսության այլընտրանքը աղետալի հետևանքներ կարող է ունենալ Հայաստանի համար: Նոր Մարտի 1-ը Հայաստանը կարող է
հետ շպրտել առնվազն մեկ տասնամյակ` մեր երկիրը վերջնականապես կողպելով եվրասիական ճահիճում: Փողոցի դիկտատուրայի հաստատումը Հայաստանը կարող է նմանեցնել 90-ականների անկայուն, պերմանենտ հեղաշրջումների շղթան չհաղթահարող Ադրբեջանին` դրանից բխող հետևանքներով:
Մենք բոլորս` առաջին հերթին, հանրային կշիռ ունեցող մարդիկ, պետք է հասկանան, որ Հայաստանն իրենց խոսքի և գործի կարիքն ունի հենց հիմա` այսօր, անհապաղ:
Պոստֆակտում իմաստուն խոսքերը, խորիմաստ վերլուծությունները գրոշի արժեք չեն ունենա, որովհետև անտագսնիստական Հայաստանում խոսքն այլևս կորցնելու է արժեքը:
Լուսանկարը՝ Photolure-ի
