ԱՄՆ-ի գերագույն դատարանը համաձայնել է քննել գործերը, որոնք վիճարկում են Օբամայի բժշկական բարեփոխման մաս հանդիսացող՝ այսպես կոչված հակաբեղմնավորման մանդատի օրինականությունը: Համաձայն «հակաբեղմնավորման մանդատի»՝ ԱՄՆ-ում կոմերցիոն ընկերությունները պարտավոր են իրենց աշխատակիցներին տրամադրել բժշկական ապահովագրություն, որը կներառի հակաբեղմնավորիչ միջոցների, ինչպես նաև անհրաժեշտության դեպքում՝ ամլացման ծախսերը:
Օրենքի այդ նորմը միամգամից բողոք է առաջացրել ԱՄՆ-ում, նաև դարձել դատական հայցերի հիմք: Առնվազն 3 դեպքում հայցերը ներկայացվել են կրոնական նկատառումներով: Դրանք ներկայացրել են քրիստոնյա ձեռնարկատերերն իրենց ընկերությունների անունից: Գերագույն դատարանում լսումները սպասվում են գարնանը:
Սպիտակ տունը միանգամից արձագանքել է գերագույն դատական ատյանի կողմից գործերը քննության առնելու մասին հայտարարությանը:
Նախագահի մամլո քարտուղարը հայտարարել է. «Մենք վստահ ենք, որ այդ պահանջն օրինական է և շատ անհրաժեշտ կանանց առողջության համար և համոզված ենք, որ գերագույն դատարանը մեզ հետ կհամաձայնի»:
