Նոյեմբերի 26-ին պաշտոնական այցով Արգենտինայի Հանրապետությունում գտնվող ՀՀ ԱԺ նախագահ Հովիկ Աբրահամյանը Ազգային կոնգրեսում հանդիպել է Արգենտինայի Հանրապետության փոխնախագահ, Սենատի նախագահ Ամադո Բուդուի հետ:
ԱԺ նախագահը շնորհակալություն է հայտնել պաշտոնական հրավերի ու ջերմ ընդունելության համար և նշել, որ Հայաստանը մեծապես հետաքրքրված է Լատինական Ամերիկայի երկրների, այդ թվում Արգենտինայի հետ բարեկամական հարաբերությունների զարգացմամբ և խորացմամբ: Նա բարձր է գնահատել հայ-արգենտինյան հարաբերությունների զարգացման ներկայիս քաղաքական մակարդակը և կարևորել է երկկողմ բարձրաստիճան այցելությունների, տարբեր մակարդակներով կանոնավոր շփումների շարունակականությունը: Հովիկ Աբրահամյանի գնահատմամբ` երկու երկրների բարեկամական հարաբերությունները, ինչպես նաև ձևավորված իրավապայմանագրային դաշտն ամուր հիմք են առևտրատնտեսական, մշակութային, զբոսաշրջության և այլ ոլորտներում լիարժեք համագործակցություն ծավալելու համար: Չնայած Հայաստանի տնտեսության մեջ կատարված արտասահմանյան ներդրումների ծավալով Արգենտինան զբաղեցնում է երրորդ տեղը շնորհիվ անվանի արգենտինահայ գործարար Էդուարդո Էռնեկյանի խոշոր ֆինանսական ներդրումների, այնուամենայնիվ, երկու երկրների միջև ապրանքաշրջանառության ծավալները չեն համապատասխանում առկա ներուժին: Պարոն Աբրահամյանը նշել է, որ անհրաժեշտ է համատեղ ջանքերի շնորհիվ գործնական նոր ասպարեզներ գտնել այն առավելագույնս օգտագործելու համար: «ՀՀ Ազգային ժողովը շահագրգռված է Արգենտինայի խորհրդարանի երկու պալատների հետ էլ ավելի զարգացնելու միջխորհրդարանական կապերը, քանզի բոլորս էլ գիտակցում ենք համագործակցության այս ձևաչափի մեծ դերակատարությունը երկկողմ հարաբերությունների զարգացման գործում: Համոզված եմ, որ մեր այցը դրական տեղաշարժ կարձանագրի մեր երկու բարեկամ պետությունների հարաբերություններում»,- ասել է ԱԺ նախագահը: Նա գոհունակությամբ արձանագրեց, որ երկու խորհրդարաններում ստեղծվել են պատգամավորական բարեկամության խմբեր, որոնք իրենց գործունեությամբ կարող են նպաստել Հայաստանի և Արգենտինայի միջև շփումների ակտիվացմանը: Կարևորվել է համագործակցությունը միջազգային կառույցներում:
Ողջունելով և շնորհակալություն հայտնելով ԱԺ նախագահին իր հրավերը ընդունելու և Արգենտինա պաշտոնական այց կատարելու համար` Ամադո Բուդուն բարձր է գնահատել հայ-արգենտինյան բարեկամական հարարաբերությունները: Նա անհրաժեշտ համարեց միջխորհրդարանական կապերի հետագա զարգացումը, երկկողմ շփումների ակտիվացումը, կարևորեց բարեկամական խմբերի աշխատանքը: «Վստահ եմ, որ ձեր այցը նոր լիցք կհաղորդի երկու բարեկամ երկրների և ժողովուրդների բարեկամության ամրապնդմանը և կխթանի բազմակողմ համագործակցությունը: Երկու երկրների հարաբերությունների զարգացման գործում մեծ դեր ունի հայկական համայնքը, որը կարևոր ներգրավվածություն ունի Արգենտինայի քաղաքական և տնտեսական կյանքում: Հայերը մեծ ներդրում ունեն մեր երկրի բարգավաճման և հզորացման գործում»,- ասաց Արգենտինայի փոխնախագահ, Սենատի նախագահ Ամադո Բուդուն: Նա կարևոր համարեց նաև Հայաստանի հետ համագործակցության զարգացումը տնտեսության, գիտության, կրթության, մշակույթի և այլ ոլորտներում:
Հանդիպման ընթացքում անդրադարձ է կատարվել տարածաշրջանային խնդիրներին, ԼՂ հակամարտության կարգավորմանը, հայ-թուրքական հարաբերություններին: Հովիկ Աբրահամյանը նշել է, որ Հայաստանը բարձր է գնահատում ԼՂ հիմնախնդրի կարգավորման հետ կապված Արգենտինայի չեզոք դիրքորոշումը, ինչը համահունչ է ԵԱՀԿ Մինսկի խմբի եռանախագահների դիրքորոշմանը: ԱԺ նախագահը շնորհակալություն հայտնեց 2006 թ-ին Արգենտինայի Ներկայացուցիչների պալատի, ապա նաև Սենատի կողմից ընդունված օրինագծի համար, համաձայն որի` երկրում յուրաքանչյուր տարվա ապրիլի 24-ը հռչակվում է որպես «Հանդուրժողականության և ազգերի միջև հարգանքի օր»՝ ի հիշատակ Հայոց ցեղասպանության զոհերի:
Հովիկ Աբրահամյանը Ամադո Բուդուին պաշտոնական այցով հրավիրել է Հայաստան. հրավերը սիրով ընդունվել է:
ԱԺ նախագահի գլխավորած պատվիրակությունը շրջայց կատարեց Ազգային կոնգրեսի շենքում:
Նշենք, որ հանդիպումը ուղիղ հեռարձակվել է Արգենտինայի կենտրոնական հեռուստատեսությամբ:
