«Եթե առաջիկայում այլ զարգացումներ և ֆունդամենտալ գործոններ չլինեն, ապա ռուսական ռուբլու արժեզրկումն այսպիսի մակարդակի վրա էլ կմնա»,- «Առաջին լրատվական»-ի հետ զրույցում նշեց ՀՀ Կենտրոնական բանկի նախկին նախագահ, տնտեսագետ Բագրատ Ասատրյանը և միևնույն ժամանակ հավելեց, որ 10 օրվա կտրվածքով ռուսական ռուբլին արժեզրկվել է արդեն 8%-ով, ընդ որում՝ սա հետևանք է ԱՄՆ-ի կողմից ձեռնարկված դեռևս հերթական պատժամիջոցների, և առաջիկայում էլ հնարավոր է նոր պատժամիջոցներ հայտարարվեն ընդդեմ Ռուսաստանի։
Հիշեցնենք, որ ԱՄՆ ֆինանսների նախարարությունն ապրիլի 6-ին նոր պատժամիջոցներ սահմանեց Ռուսաստանի 38 պաշտոնյաների, խոշոր գործարարների ու ընկերությունների նկատմամբ. հրապարակված ցուցակում հայտնված մարդկանց մուտքը ԱՄՆ արգելվում է, սառեցվում են նրանց բոլոր հաշիվները Միացյալ Նահանգներում, ամերիկյան ընկերություններին էլ արգելվում է որևէ գործ ունենալ ցուցակում հայտնված մարդկանց և ընկերությունների հետ։
Բագրատ Ասատրյանի հավաստմամբ՝ ԱՄՆ-ը մտածված է այս պատժամիջոցները կիրառում, և այս անգամ թիրախային քայլերն ուղղված են հենց ռուսական ներդրումային շուկաների դեմ։
Վերջինս նկատեց նաև, որ այս ժամանակահատվածում կար մի կարևոր գործոն, որը զսպում էր ռուբլու անկման միտումը, և դա նավթի համաշխարհային գների որոշակի աճն էր։
«Ռուսաստանի համար առաջնայինը հենց նավթի միջազգային գներն են, և եթե առաջիկայում նավթի գինը ընկնի, ապա ռուբլու արժեզրկման գործընթացը կխորանա։ Բացի սրանից, եթե առաջիկայում էլ նոր պատժամիջոցներ կիրառվեն, ապա դա ևս իր հերթին բացասական ազդեցություն կունենա»,- ասաց տնտեսագետը։
Գնահատելով նաև ռուսական ռուբլու անկման և ռուսական տնտեսության մեջ այս բացասական միտումների հնարավոր հետևանքները Հայաստանի տնտեսության վրա՝ հայ-ռուսական տնտեսությունների փոխկապակցվածության համատեքստում, Բագրատ Ասատրյանը շեշտեց. «Նայելով վերջին ժամանակներում Հայաստանի տնտեսության զարգացման կորը՝ տեսնում ենք, որ կային արտահանման աճի բարձր տեմպեր, և ուղղություններից մեկը մասնավորապես հենց ռուսական շուկան էր, և հիմա արդեն ինքնարժեքի խնդիր է գալիս, այսինքն՝ 8%-ով արժեզրկված ռուսական ռուբլին բավականին թանկ է մեր արտահանողների համար։ Բացի սրանից՝ վտանգ կա նաև, որ Ռուսաստանից Հայաստան եկող մասնավոր տրանսֆերտները կարող են նվազել, և դեռ հայտնի չէ՝ մյուս զարգացումները կբերեն այս ճեղքը կփակե՞ն, թե՞ չէ»։
Ինչպես պնդում է մեր զրուցակիցը՝ թե՛ ՀՀ Կենտրոնական բանկը, թե՛ նաև կառավարությունը պետք է շատ զգույշ ու խելամիտ գործեն, ինչպես նաև շատ լուրջ մտածեն մեր տնտեսության դիվերսիֆիկացիայի մասին։ Նրա խոսքով՝ չպետք է շատ ոգևորվել ռուսական շուկայի հնարավորություններով, ինչը շատ հարաբերական է, և այնպես էլ չի, որ ռուսական շուկան շատ մեծ հնարավորություններ ունի: Ըստ Ասատրյանի՝ պետք է մտածել նաև այլընտրանքի մասին։
Մանրամասները՝ տեսանյութում։