Նոր Զելանդիայի Վելինգթոն քաղաքի կենդանաբանական այգում բնակվող կապիկները կարողացել են վռնդել գողերին, որոնց հաջողվել է իրենց վանդակում հայտնվել։ Այս մասին հաղորդում է UPI-ն։
Ուրբաթ 12 կապիկների վանդակ ներթափանցած հանցագործներին չի հաջողվել առևանգել կենդանիներին։ Սակայն որոշ կապիկներ աննշան վիրավորվել են։
Կենդանաբանական այգու ներկայացուցիչները ենթադրում են, որ գողերի և կենդանիների միջև ծեծկռտուք է սկսվել։ Արդյունքում կապիկները կարողացել են հետ մղել հարձակումը։
«Նրանց հետ ամեն ինչ կարգին է։ Մենք նրանց բոլորին միասին ենք պահում, որպեսզի աջակցեն միմյանց՝ մինչև սովորական ռեժիմի անցնելը։ Առաջիկա օրերին նրանց նկատմամբ ավելի ուշադիր կլինենք՝ համոզվելու համար, որ ամեն ինչ լավ է»,-ասվում է կենդանաբանական այգու հայտարարությունում։
