«Միայն Զատուլինի հայտարարությունը մեզ համար խիստ անբավարար է, նման հայտարարություն պետք է լինի Պետդումայի նախագահի կամ նախագահ Պուտինի անունից, քանի որ հարկավոր է միջպետական հարաբերությունների բարձր մակարդակ։ Ապրիլին տեսել ենք ՌԴ-ի կողմից սադրած պատերազմը»։ Այս մասին «Առաջին լրատվական»-ի հետ զրույցում ասաց քաղաքագետ, քաղ. գիտ. դոկտոր, պրոֆեսոր Լևոն Շիրինյանը՝ անդրադառնալով ՌԴ Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինի հայտարարությանը, թե Հայաստանի նկատմամբ ցանկացած հարձակում Ռուսաստանը դիտարկելու է որպես սպառնալիք իր նկատմամբ։
Լևոն Շիրինյանը նշեց, որ Զատուլինին պիտի հիշեցնել Դրո-Լեգրան համաձայնագրի ու դրա կատարման մասին։
Քաղաքագետը կարծում է, որ Զատուլինի հիշեցումը նաև Վազգեն Սարգսյանի խոսքերը, թե՝ Ռուսաստանը, ի դեմս Հայաստանի, իր սեփական Իսրայելն ունի Հարավային Կովկասում, նշանակում է, որ ծայրահեղ վիճակներում Հայաստանը կարող է դառնալ թիրախ միջուկային հարվածների համար այլ պետությունների կողմից։
«Դա նշանակում է նաև կոմպլեմենտար քաղաքականության ոչնչացում, որին մենք տառապանքով՝ապրիլյան պատերազմի արդյունքով, «Սասնա ծռերի ապստամբությամբ հասել ենք։ Դա են ուզում ոչնչացնել։ Իրականությունը Վազգեն Սարգսյանի հայտարարությունից հետո շատ փոխվել է, տրանսֆորմացվել է։ Եվ կրկնեմ ՝ մենք ապրիլին տեսել ենք Ռուսաստանի սադրած պատերազմը։ Եթե իրենք դասեր են քաղել, առաջին քայլը պիտի լինի ճանաչել Արցախի Հանրապետությունը»,- ընդգծեց քաղաքագետը։
Շիրինյանը կարծում է, որ Զատուլինի հայտարարությունները նշանակում են, որ մենք առճակատման մեջ ենք մտնում ԱՄՆ-ի և ՆԱՏՕ-ի հետ։
Մանրամասները՝ տեսանյութում:
