Այսօր Երևանում տեղի ունեցավ «Բաց հասարակության հիմնադրամներ-Հայաստան» կազմակերպության և «Բաց հասարակություն Վրաստան» հիմնադրամի կազմակերպած «Վարշավայից դեպի Վիլնյուս. Խաչմերուկներում- Հայաստան և Վրաստան» վերտառությամբ հանրային քննարկումը, որի ժամանակ ներկայացվեցին և քննարկվեցին ԱլԳ ճանապարհային քարտեզի 2012-2013թթ. մշտադիտարկման արդյունքները:
Հայաստանյան զեկույցը բաղկացած էր երեք հատվածներից, որոնք առնչվում էին ՀՀ-ում ընտրական ստանդարտներին, արդարադատության համակարգի անկախությանը և մամուլի ազատությանը:
ՀՀ-ում իշխանությունների կողմից ներդրված ընտրական ստանդարտներին անդրադարձավ Վարուժան Հոկտանյանը՝ԹԻ հակակոռուպցիոն ՀԿ-ի գործադիր տնօրենը: Նա խոսեց վերջին տարիներին ՀՀ-ում անցկացված ընտրությունների և ընտրությունների կեղծման գործիքների՝ ընտրակաշառքների, ուռճացված ընտրացուցակների, ԸԸՀ անդամների, վստահված անձանց չտեղեկացվածության և դա թեկնածուի օգտին օգտագործելու մեխանիզմին:
ԹԻ գործադիր տնօրենը նաև հանդես եկավ հարցադրմամբ՝ ինչո՞ւ էին եվրոպական կառույցներն աչք փակում ՀՀ-ում անցկացվող ընտրությունների վրա:
«Երբ եվրոպական կառույցները աչք էին փակում ՀՀ-ում անցկացվող ընտրությունների վրա, մենք պետք է որոշակի հետևություններ անեինք. ինչ-որ չափով խոսքը վերաբերում է ընդդիմադիր կուսակցություններին և քաղաքացիական հասարակությանը, որոնք շատ ավելի ագրեսիվ և կոշտ դիրքորոշում պետք է ունենային եվրոպական կառույցների նկատմամբ, որպեսզի նրանք հասկանային ՝ արդյոք պե՞տք էր աչք փակել այս ամենի վրա, թե՞ ոչ:
Այս ընտրությունների խնդիրը կարևորվում է նրանով, որ հետագայում, եթե մենք իսկապես ունենք քաղաքակրթական իմաստով ինտեգրվելու մտադրություն, որովհետև ՄՄ-ում լինել-չլինելը և քաղաքակրթական ինտեգրումը հնարավոր է տարանջատել. քաղաքակրթական ինտեգրում հնարավոր չէ, եթե մենք այսպիսի ընտրություններ ենք անցկացնում»,- նման տեսակետ հայտնելով՝ իր խոսքը եզրափակեց Վարուժան Հոկտանյանը:
