Ադրբեջանին զայրացրել է Հայաստանի Հանրապետության նախագահի մամլո քարտուղար Արման Սաղաթելյանի փայլուն աշխատանքը, որը նախօրեին օպերատիվ կերպով լուսաբանել է Հայաստանի և Ադրբեջանի նախագահների հանդիպումը Վիեննայում:
Haqqin.az-ը, մասնավորապես, քննադատության ենթարկել Ադրբեջանի նախագահի մամլո ծառայության ղեկավար Ազեր Գասըմովին, որը «ոչ միայն լռություն է պահպանել նախագահների հանդիպման ընթացքում, այլև նույնիսկ չի նպաստել այն բանին, որ ինչ-որ մեկը խոսի ճիշտ պահին»:
Կայքի փոխանցմամբ՝ ադրբեջանական ԶԼՄ-ները նախագահների հանդիպման մասին տեղեկատվությունը քաղել են Արման Սաղաթելյանի Twitter-ի միկրոբլոգի հաղորդագրություններից, որը պարբերաբար թարմացրել է դրանք:
«Հարց է ծագում՝ ինչի համար էր պետք նվաստացնել մեզ՝ ադրբեջանցի լրագրողներիս, այն աստիճան, որ մենք սեփական նախագահի մասին տեղեկատվություն ենք քաղել հայկական ԶԼՄ-ներից: Եվ դրանից հետո մենք հպարտորեն հայտարարում ենք Ադրբեջանի ֆենոմենալ զարգացման և Հայաստանի տնտեսության հանդեպ ունեցած զգալի առավելության մասին… Ադրբեջանում գոյություն ունեն մի քանի ծառայություններ, որոնք անմիջականորեն զբաղվում են տեղեկատվական անվտանգությամբ»,- գրում է haqqin.az-ը և հարցադրում. «Ինչի՞ համար են Ադրբեջանում գործում տեղեկատվության անվտանգության ապահովման այդ բոլոր ծառայությունները»:
