Yahoo ընկերությունը կձեռնարկի հավելյալ միջոցառումներ՝ իր օգտատերերի անձնական տվյալները պաշտպանելու համար: Այս մասին ասվում է ընկերության պաշտոնական հաղորդագրության մեջ:
Ինչպես նշել է ընկերության գլխավոր տնօրեն Մարիսա Մայերը՝ մինչև 2014-ի առաջին եռամսյակի վերջը ընկերության տվյալների կենտրոնների միջև փոխանցվող բոլոր տվյալները կպաշտպանվեն կոդավորման SSL համակարգով: Բացի այդ, Yahoo-ի փոստից օգտվողներին կտրամադրվի նույն համակարգը կիրառելու հնարավորություն՝ այլ ընկերությունների փոստային սերվերներին ուղարկվող իրենց էլեկտրոնային նամակների պաշտպանության համար:
Ներկայում Yahoo-ն արդեն կիրառում է SSL-ը իր փոստային ծառայությունից օգտվողների միջև էլեկտրոնային նամակագրությունը պաշտպանելու համար: Նման պաշտպանությունը ներմուծվել էր այն բանից հետո, երբ հոկտեմբերի վերջին ԶԼՄ-ներում տեղեկություն էր հայտնվել, թե ԱՄՆ Ազգային անվտանգության գործակալությունը կարողացել է լրտեսել ողջ աշխարհում Yahoo-ի տվյալների կենտրոնները միմյանց կապող գծերը:
Անվտանգության հավելյալ միջոցառումների մասին ընկերության հայտարարությունը հաջորդել է Կալիֆոռնիայում իր դեմ դատական հայցի ներկայացմանը: Ընկերությանը մեղադրել են այլ փոստային ծառայությունների բաժանորդների հետ կապ հաստատող իր օգտատերերի նամակագրությունները «որսալու» մեջ: Նման կերպ հավաքված տվյալներն իբր այնուհետև կիրառվել են սպամի տարածման համար:
Yahoo-ն մշտապես հայտնել է, որ օգտատիրական տվյալների գաղտնիությունը շատ կարևոր է ընկերության համար: