Եթե 20-ականներին Հայաստանում դաշնակցական դիկտատուրա էր հաստատված, և Լենինը թուրքերին զենք էր տրամադրում, ապա այսօր պատմությունը կրկնվում է՝ Ռուսաստանը զենք է մատակարարում Ադրբեջանին: Այսօր կայացած մամուլի ասուլիսի ժամանակ այս մասին ասաց ԱԻՄ նախագահ Պարույր Հայրիկյանը:
«Այսօր մեզ մեծ վտանգ է սպառնում: Մեր ժողովրդի 70 տոկոսից ավելին դեմ է Մաքսային միություն ասված խուժանությանը: Որոշումը կայացվեց մեկ օրվա ընթացքում: Ճնշումների ներքո Սերժ Սարգսյանը եվրոպական ուղուց անցում կատարեց ռուսական ստրկության ուղի, որդեգրվեց միջակության քաղաքականություն, նույնիսկ ՌԴ դեսպանն ասաց, որ՝ այո, Հայաստանը պետք է որոշ մասով զիջի իր ինքնիշխանությունը:
Հայաստանի՝ ՄՄ անդամ դառնալու հաջորդ օրվանից մարդիկ կսկսեն լքել իրենց հայրենիքը: Մարդիկ այստեղ ապրում են երկրի ինքնիշխանության համար: Ռուսաստանն արել և անում է ամեն հնարավոր բան՝ Հայաստանն առանց հայերի թողնելու համար: Ռուսաստանը մնացել է թաթար-մոնղոլական ոսկե հորդայի հետնորդը: Խոսքը ռուսական իմպերիալիզմի մասին է»,- հիշեցրեց նա՝ համոզմունք հայտնելով, որ Հայաստանն ունի Մաքսային միությանը չանդամակցելու բոլոր հնարավորությունները:
«ԵՄ-ն ունի 60 տարվա պատմություն, իսկ ՄՄ-ն չի էլ ձևավորվել: Պարզ չէ՞, որ պետք է գնալ առաջինի ուղղությամբ: Հայ ժողովրդին տանել ՄՄ ուղղությամբ, կնշանակի արհամարհել, ոչխարի տեղ դնել նրան: ՄՄ-ին անդամակցելու հաջորդ օրն իսկ Հայաստանին ստիպելու են հայտարարել, որ չեն հավատում Մինսկի խմբի միջնորդությամբ ԼՂ հարցի լուծմանը, այլ վստահում են Ռուսաստանին: Եվ այստեղից էլ ամեն բան կսկսվի՝ ռուս-թուրքական նոր պայմանագրեր և այլն:»
ԱԻՄ առաջնորդի խոսքով՝ հասարակության՝ ՄՄ-ին դեմ լինելու ֆոնին քաղաքական գործիչների լռությունն անթույլատրելի է: «Նա, ով համարվում է ընտրված նախագահ, այս հարցում ընդհանրապես չկա: Բարեբախտաբար, կան անհատական ելույթներ, որոնց հեղինակներին ես ողջունում եմ: Կան նաև ճորտերի խմբեր: Պարզվում է, սակայն, Հայաստանում կուսակցություններ չկան: ՀՅԴ-ն, օրինակ, դեմ է ՀՀ վարած արտաքին քաղաքականությանը, սակայն նույն ոլորտում բարձրագույն պաշտոնների է հավակնում: Սա խոսում է այդ ուժի ներսում եղած անհաստատության մասին»:
Ամփոփելով՝ Պարույր Հայրիկյանը տեղեկացրեց, որ իրենց հանրահավաքը տեղի կունենա նոյեմբերի 29-ին: «Մեր հանրահավաքների նպատակն այն է, որ մարդիկ գան հրապարակ՝ ասելու. «Մենք ոչխար չենք, մենք չենք ուզում դառնալ օտարի ստրուկ»»:
