Քրեագետ Սերգեյ Գալոյանի համար զարմանալի է լրատվամիջոցներում «Թեփ Արմենի» սպանության շուրջ բարձրացված մեծ աղմուկը:
«Նա որևէ մեծ գործի չի խառնվել, ինձ պարզապես զարմացնում է այս աղմուկը: Ովքեր անձնական հաշիվներ են ունենում, իրար տալիս-սպանում են, և դառնում է քննարկման թեմա: Այս Արմենը ինչ-որ գործերի խառնված է եղել, բայց սրանք անձնական բնույթի են, այդքան մեծ նշանակություն տալը մի քիչ շատ կլիներ:
Որ ասում են կրիմինալ աշխարհի ներկայացուցիչ, թվում է՝ Յապոնչիկն է: Հանցագործ աշխարհից կարող է լինել պետական պաշտոնյա, որ, ասենք, թոշակառուի փողն է կերել. դա հանցագործություն չէ՞:
Մի թաղամասում կարող են մի երկու հոգի իրար ծեծեն, գնան բանտ նստեն, ասեն՝ կրիմինալ էր»,- ասաց նա:
Գալոյանի խոսքով՝ կրիմինալ աշխարհը 1980-ականներից փոխվել է, ոչ մի կանոն չի պահպանվում, դրանք լրիվ խառնվել են իրար:
Այն գաղափարական հիմքը, որ ժամանակին ունեին, արդեն խախտվել է. Դեդ Հասանի, մյուսների նման հզորներից հետո «Թեփ Արմեն» է հանդես գալիս, վաղը կլինի «Տաշեղ Աշոտ», այսինքն՝ ըստ քրեագետի՝ հարցը մանրանում է, ստանում մեծ հնչեղություն:
Գալոյանը նկատում է՝ այս ամենը կատարվում է կրիմինալ աշխարհի հեղինակությունը ոչնչացնելու, նրանց հզորությունը ծիծաղելի դարձնելու համար, և այն կատարվում է իրավապահների կողմից, հատկապես՝ Ռուսաստանի:
Հարցին՝ արդյոք քրեական աշխարհում ընդունվա՞ծ է հարազատին սպանել հանուն մեկ այլ քրեական հեղինակության, Գալոյանը նկատեց՝ նայած, թե հարազատ ասելով ինչ է հասկացվում:
«Ախպերն ախպորն ա սպանում, օրենքով գողն իր ձեռքով կամ իր հրամանով օրենքով գող չպիտի սպաներ, բայց հիմա օրենքով գողն օրենքով գող է սպանում, սակայն այս պատմությունը ներկայացնել որպես կրիմինալ աշխարհում կատարված մեծ իրադարձություն, արդեն չափազանց է»,- ասաց նա:
Միաժամանակ Գալոյանը նշեց, որ այս պատմության մեջ շատ մանրամասներ դեռևս ճշգրտման և մանրակրկիտ ուսումնասիրության կարիք ունեն:
