Ազգային ժողովի «Ժառանգություն» խմբակցության ղեկավար Զարուհի Փոստանջյանը նոյեմբերի 15-ին ԱԺ ճեպազրույցների ժամանակ լրագրողների խնդրանքով անդրադարձավ հարցին, թե ինչու է «Ժառանգություն» կուսակցության ղեկավար Րաֆֆի Հովհաննիսյանը լռություն պահպանում դերասան Վարդան Պետրոսյանին կալանավորելու հարցում, երաշխավորագիր չի ներկայացնում և ընդհանրապես որևէ կերպ իր աջակցությունը չի հայտնում: Լրագրողները միաժամանակ հիշեցրին նրան՝ ժամանակին նույն Վարդան Պետրոսյանը կանգնեց Րաֆֆի Հովհաննիսյանի կողքին:
Փոստանջյանի համար հարցի ձևակերպումը ոչ կոռեկտ թվաց: «Այնպես չի, որ եթե ժամանակին մեկը մյուսին աջակցում էր, ապա պետք է նման ձևով պատասխան տան։ Աջակցությունը պետք է լինի բարոյականության սկզբունքների հիման վրա. որպես բարոյական մարդ, իհարկե, պարոն Հովհաննիսյանը աջակցում է, որովհետև մենք դիտարկում ենք նրա նախնական կալանքն իբրև ապօրինություն»,- ասաց պատգամավորը։ Նա ուղիղ համեմատություններ արեց դերասանի և Մոսկվայում կալանավորված Հրաչյա Հարությունյանի հետ կատարվածի միջև. Հարությունյանին ևս դեռ չապաքինված կալանավորեցին։
Փոստանջյանը ևս մեկ անգամ շեշտեց, որ դերասանի նկատմամբ իրականացվածը համարում են ապօրինություն, սակայն նշեց, որ իր համար անհասկանալի է՝ աջակցության առումով ի՞նչ պետք է արվի: «Մենք որոշում կայացնող չեն, դատարան չենք, որ մերժեինք»,- ասաց նա։
