Իրաքը և Թուրքիան նոր էջ են բացել երկկողմ հարաբերություններում և վերադարձել են քաղաքական երկխոսության ու համակարգման: Ինչպես հաղորդում է ITAR-TASS-ը, այս մասին հայտարարել են երկու երկրների արտգործնախարարները Բաղդադում բանակցություններից հետո:
Իրաքի արտգործնախարար Հոշիար Զիբարին մասնավորապես հաղորդել է, որ կողմերը որոշում են կայացրել վերսկսել միջկառավարական հանձնաժողովի գործունեությունը: Նրա խոսքերով՝ Թուրքիան, որի հետ ապրանքաշրջանառությունը հասնում է 12 միլիարդ դոլարի, Իրաքի առևտրային խոշորագույն գործընկերն է: Զիբարին նշել է, որ թուրք արտգործնախարար Ահմեդ Դավութօղլուի հետ քննարկել են հեռանկարային նախագծեր նավթի, էներգետիկայի, գյուղատնտեսության և երկաթուղային հաղորդակցության ոլորտներում:
Նա նաև անդրադարձել է սիրիական հակամարտությանը և նշել, որ Իրաքը և Թուրքիան տարբեր մոտեցումներ ունեն այս հարցում: «Թուրքիան աջակցում է ընդդիմությանը: Իրաքը կապեր ունի ինչպես ընդդիմության, այնպես էլ Բաշար Ալ-Ասադի կառավարության հետ: Այսպիսով՝ համատեղ համագործակցության դաշտ կա, նույնիսկ եթե հարևան երկրում ընթացող իրադարձությունների վերաբերյալ տեսակետները տարբերվում են»,- ասել է նա:
Դավութօղլուն իր հերթին պատրաստակամություն է հայտնել աջակցել Իրաքին՝ պայքարելու ահաբեկչական խմբավորումների դեմ, որոնք օգտվում են Սիրիայում տեղի ունեցող իրադարձություններից:
Արտգործնախարարները նշել են, որ Անկարան և Բաղդադը մտադիր են ակտիվ մասնակցություն ունենալ Սիրիայի հարցով «Ժնև-2» համաժողովին, քանի որ իրենց երկրներն ամենաշատն են կորուստներ կրել սիրիական ճգնաժամի պատճառով:
