Հայաստանի նախագահի թեկնածու Արմեն Սարգսյանն իր հանդիպումների շարքը երեկ սկսեց ՀՀԿ-ից` թեև քաղաքական տրամաբանությունը հուշում է, որ դեսպանը Հանրապետական խմբակցության հետ հանդիպելու անհրաժեշտություն չուներ: Համենայնդեպս, թեկնածուն կուսակցության հետ հանդիպում է առաջադրվելուց ոչ թե հետո, այլ` առաջ: Մյուս կողմից` Արմեն Սարգսյանը միայն ֆորմալ առումով է ՀՀԿ-ի թեկնածուն, իսկ իրականում նրա ապագա նախագահության հարցը միանձնյա որոշել է Սերժ Սարգսյանը: Սեյրան Սարոյանը, որն աչքի է ընկնում իր շիտակությամբ, թերթերից մեկին երեկվա հանդիպման մասին անկեղծորեն ասել է. «Կարող էր և այդ հանդիպումը չլիներ, կուսակցության ղեկավարն ասել է` ընտրենք, ընտրելու ենք»։
Այս օրերի ներքաղաքական իրադարձությունների խորքային հետևանքը լինելու է այն, որ ՀՀԿ այսօրվա վերնախավը զրկվելու է իշխանությունից: Արմեն Սարգսյանի հետ կապված օպերացիան դրա դրսևորումներից մեկն է: Նախագահի թեկնածուն հանրապետական պատգամավորների հետ հանդիպել է ոչ թե քաղաքական բովանդակային հարթության վրա, այլ ֆորմալ առումով կարևորել է հանդիպումը խմբակցության հետ, որտեղ ամենաշատն են «կոճակ սեղմողները»:
Խորհրդարանական կառավարման պարագայում ԱԺ մեծամասնությունը պետք է լիներ իշխանության կենտրոնը, նախագահի և վարչապետի թեկնածուներ առաջադրելուց զատ` պետք է ապահովեր նրանց նկատմամբ լոյալություն մյուս խմբակցությունների կողմից: Դա առաջին հերթին վերաբերում է նախագահի թեկնածուին, որն առաջին փուլում հաղթելու համար պետք է ստանա 79 պատգամավորի աջակցություն: Կոալիցիային անհրաժեշտ է «Ծառուկյան» դաշինքի առնվազն 14 պատգամավորի աջակցություն այս խնդիրը լուծելու համար: Տրամաբանությունը հուշում է, որ Վահրամ Բաղդասարյանը` փիլիսոփայելու փոխարեն, պետք է ակտիվ բանակցությունների մեջ լիներ Գագիկ Ծառուկյանի թիմի հետ: Սակայն «Ազատության» հարցին, թե բանակցություններ տարվո՞ւմ են Գագիկ Ծառուկյանի ղեկավարած դաշինքի հետ, Հանրապետական խմբակցության ղեկավարն ուշագրավ պատասխան է տվել. «Բանակցությունները մենք չէ, որ պետք է վարենք, բանակցությունները պետք է վարի նախագահի թեկնածուն։ Անկեղծ, մենք որևէ նմանատիպ բանակցությունների ցանկություն չենք հայտնել՝ ոչ վարել ենք նման բանակցություններ, ոչ էլ կվարենք, որովհետև նախագահի թեկնածուն ինքն է քաղաքական ուժերի հետ հանդիպման ցանկություն հայտնել»։ Սա առնվազն տարօրինակ պատասխան է, որի հիմքում, սակայն, Վահրամ Բաղդասարյանի, ըստ էության, ինքնախոստովանությունն է, որ ՀՀԿ վերնախավը «խաղից դուրս» վիճակում է:
Սերժ Սարգսյանի «ընդարձակ մեծամասնության» ձևակերպումը ՀՀԿ-ին իշխանությունից զրկելու բանաձևն է: Այս լույսի ներքո Բաղդասարյանի ասածը նույնիսկ տրամաբանական է, որովհետև Հանրապետականի «ծերակույտն» օբյեկտիվորեն չի կարող մասնակցել մի գործընթացի, ինչի հետևանքով զրկվելու է իշխանությունից:
«Ընդարձակ մեծամասնության» բանաձևը չի ենթադրում կոալիցիոն ձևաչափի ֆորմալ փոփոխություն, որովհետև դա, ըստ էության, ոչ թե հրապարակային քաղաքականության գործիք է, այլ համակարգի նոր կոնսենսուս: Գագիկ Ծառուկյանը ցանկացած պարագայում մաս է կազմելու համակարգային նոր ստատուս-քվոյին, սակայն նա չի կարող լուրջ ընդունել ո՛չ Վահրամ Բաղդասարյանի, ո՛չ էլ նույնիսկ` Արմեն Սարգսյանի երաշխիքները:
Սերժ Սարգսյանն այսօր միակ մարդն է, որը կարող է համակարգային կոնսենսուսի երաշխավոր լինել ու որոշումներ կայացնել: Խորհրդարանական համակարգը կոչված էր ամրագրել կառավարող կուսակցության քաղաքական պատասխանատվությունը` երկրորդ պլան մղելով անձերին, սակայն ՀՀԿ-ն վերածվել է զուտ քաղաքական ցուցանակի, որի հետևում Սերժ Սարգսյանը մտադիր է հավաքել միանգամայն նոր կադրային «տեսականի»:
