Վրաստանում այս շաբաթվա ընթացքում արդեն երկրորդ անգամ հրապարակավ այրել են Ռուսաստանի պետական դրոշը: Ինչպես հաղորդում է «Գրուզիա Օնլայն»-ը, նոր միջադեպը տեղի է ունեցել Թբիլիսիում՝ օմբուդսմեն Ուչա Նանուաշվիլիի գրասենյակի մոտ, երկրի պաշտպանության և ներքին գործերի նախկին նախարար Բաչո Ախալայայի կողմնակիցների ակցիայի ժամանակ, ով դատապարտվել է 2006թ. «բանտային խռովության» գործով:
Ակցիայի ընթացքում, որը կայացել է հինգշաբթի՝ ուշ երեկոյան, մասնակիցները այրել են ռուսական դրոշը և օմբուդսմենի ներկայացուցչության տարածքում տեղակայել խորհրդային խորհրդանիշներ:
Նախկին նախարարի փաստաբանները և ընտանիքի անդամները Նանուաշվիլիին մեղադրում են անգործության մեջ՝ հայտարարելով, որ վերջինս չի արձագանքել Ախալայայի հանդեպ կիրառված ոչ մի խախտման, նույնիսկ այն ժամանակ, երբ հայտնի է դարձել, որ նախկին նախարարի բանտախցում գաղտնի տեսախցիկ է եղել, որը ձայնագրել է նրա հանդիպումը փաստաբանների և խորհրդարանի անդամների հետ:
Չի հստակեցվում, թե Ռուսաստանի պետական խորհրդանիշը այս իրավիճակում ինչ «մեղավորություն» ունի:
