Պակիստանցի թալիբների «Թեհրիկ-ի-թալիբան» շարժման ներկայացուցիչները հայտարարել են, որ ծրագրում են վրեժխնդրության ահաբեկչական ակցիաներ անցկացնել երկրի կառավարության դեմ: Հայտարարությունն արվել է հինգշաբթի շարժման առաջնորդի պաշտոնում մոլլա Ֆազլուլայի ընտրվելուց հետո: Նա այդ պաշտոնում փոխարինել է ոչնչացված Հակիմուլա Մահսուդին: Այս մասին հայտնում է ITAR-TASS-ը:
«Մենք հարվածներ կհասցնենք անվտանգության ուժերին, կառավարական օբյեկտներին, քաղաքական առաջնորդներին ու ոստիկաններին»,- հայտարարել է պակիստանցի թալիբների ղեկավարներից մեկը՝ Ասմաթուլա Շահինը:
Նոյեմբերի 7-ին պակիստանցի թալիբները հայտարարել էին, որ չեն մասնակցի Պակիստանի կառավարության հետ խաղաղ բանակցություններին:
Պակիստանի ներքին գործերի նախարար Չոուդրի Նիսար Ալի Խանն ավելի վաղ մեղադրել էր ԱՄՆ-ին խաղաղ բանակցությունները տապալելու մեջ: Նրա խոսքով՝ ամերիկյան օդուժի անօդաչուն նոյեմբերի 1-ին հարված էր հասցրել, ինչի հետևանքով ոչնչացվել էր տեղացի թալիբների առաջնորդ Մեհսուդը: Նախարարն ընդգծել է, որ այդ առնչությամբ ԱՄՆ-ի ու Պակիստանի միջև համագործակցության բոլոր ոլորտները կվերանայվեն:
