ՀԱԿ դաշինքի մաս կազմող մի քանի կուսակցություններ՝ «Ժողովրդավարական ուղի»-ն, «Կանաչների միություն»-ը, «ՄԻ-96»-ը, «Քրիստոնեա-ժողովրդավարական վերածնունդ»-ը և «Ժողովրդավարական հայրենիք»-ը, շարունակում են անցկացնել իրենց համատեղ քննարկումները: «Առաջին լրատվական»-ի հետ զրույցում այս մասին ասաց «Ժողովրդվարական ուղի» կուսակցության նախագահ Մանուել Գասպարյանը:
«Քաղաքական զարգացումներ են լինում, մարտական ուղի անցած ազատամարտիկներ այսպես ավելի շատ ընկած ենք իրենց օգնելու հարցով, քան մեր ներքին հարցերի քննարկումով, բայց գործընթացը շարունակվում է: Առաջարկություն կա, որ մենք մեր մասնաբաժինը վերցնենք մյուսներից՝ այն, որ խմբակցությանն է հասանելի եղել… հանձնաժողովի տեղեր և մի շարք խնդիրներ, որ պետք է բաժանվի բոլոր քաղաքական միավորների միջև, ինչպես, օրինակ, ՀՀՇ-ն կարող է ստանալ, այնպես էլ՝ մենք: Սա մի փոքր առաջ ընկած եմ ասում, բայց կա այդ հարցի քննարկումը»,- ասաց նա՝ չմանրամասնելով, թե այդ առաջարկն ում կողմից է հնչել:
Գասպարյանը հավելեց, որ դա կարվի նրա համար, որ առաջիկա խորհրդարանական և նախագահական ընտրությունների ժամանակ իրենք իրենց վերահսկողությունը կարողանան պահպանել․«Ի սկզբանե այդպես է ձևավորվել, չէի ուզենա առաջ ընկնել մինչև հարցի կոնսենսուսը, առաջարկությունը դեռևս քննակման փուլում է»:
Գասպարյանն ավելացրեց, որ իրենց քննարկումների օրակարգում է եղել նաև գենդերային հավասարության վերաբերյալ օրենքը, և իրենց կարծիքով՝ «գենդեր» բառը պարզապես պետք է փոխարինվի «կին և տղամարդ» արտահայտությամբ:
Հետաքրքրվեցինք նաև, թե ստացվո՞ւմ է համագործակցությունը, դաշինք կազմվելո՞ւ է, ինչին ի պատասխան՝ մեր զրուցակիցն արձագանքեց. «Դաշինք, որպես այդպիսին, կազմվել է, քննարկումներ գնում են, խոսքը համալրվելու մասին էր գնում: Մենք հանդիպեցինք, օրինակ, շատ ավելի վաղ ՀԱԿ-ից դուրս եկած «Հայրենիք և պատիվ» կուսակցության հետ, նախագահը ողջունեց մեր մտահղացումը, սակայն պատասխանն, այսպես ասեմ, հետաձգվել է: Իսկ ինչ վերաբերվում է մեզ, ապա գործընթացները շարունակվում են»:
