Ամանորի նախաշեմին երեխաների համար կազմակերպվող ավանդական դարձած միջոցառումների շրջանակում ՀՀ նախագահական նստավայրում դեկտեմբերի 26-ին հյուրընկալվել էին Երևանի քաղաքապետարանի ենթակայության դպրոցների բարձր առաջադիմությամբ աշակերտները:
Երևանի քաղաքապետարանի աշխատակազմի հանրակրթության վարչության պետ Աննա Ստեփանյանն ասաց, որ հյուրընկալել են մայրաքաղաքի 160 դպրոցներից շուրջ 300 երեխաներ: «Բոլորի տրամադրությունը շատ բարձր է: Երեխաները օրվա հետ կապված լավ հիշողություններ կունենան իրենց կյանքում»,-նշեց նա:
Երևանի թիվ 51 դպրոցից ինը տարեկան Սասուն Խաչատրյանը, ով երազում է լողորդ դառնալ, առաջին անգամ է Նախագահի նստավայրում: Նա Ձմեռ պապիկից խնդրել և որպես նվեր ստացել հագուստ: «Ես բոլորին խաղաղություն եմ մաղթում, և թող բոլոր երեխաներն ուրախ լինեն»,-ասաց նա:
Մալաթիա-Սեբաստիա համայնքի համար 181 դպրոցից տասնամյա Յուրի Մխիթարյանը ևս առաջին անգամ է Բաղրամյան 26-ում: Նա մաղթեց, որ նոր տարում մարդիկ էլ ոչ մի տխուր օր չտեսնեն:
Ապագա ծրագրավորող, «Ուսում» դպրոցից 12-ամյա Էվան ևս շատ էր ուրախացել` հրավերը ստանալով: «Ձմեռ պապից հեռախոս եմ խնդրել, և նա ինձ իմ նվերն արդեն բերել է»,-ասաց Էվան:
Նախագահի նստավայրում Ամանորի ու Սուրբ Ծննդյան տոների առթիվ հյուրընկալված երեխաների համար մուլտհերոսներն ու ծաղրածուները շատ գեղեցիկ համերգային ծրագիր են անցկացնում: Երեխաները պարում են, երգում, ներկայացում դիտում, ակնդրում համարներ՝ օձերի, մողեսների, կապիկների և այլ կենդանիների ներգրավմամբ:
Բաղրամյան 26-ում անցկացվող միջոցառումների շրջանակում կհյուրընկալվեն նաև ՀՀ ԶՈՒ զինծառայողների, Արցախյան ազատամարտում, ինչպես նաև ապրիլյան քառօրյա պատերազմում զոհված, հաշմանդամ դարձած զինվորների, Երկրապահ կամավորների միության, ՀՀ ոստիկանության և ազգային անվտանգության ծառայության աշխատակիցների ընտանիքների երեխաներ և թոռներ:
