Հայաստան-ԵՄ համաձայնագրի, ինչպես նաև սահմանադրական փոփոխությունների շրջանակներում բարեփոխումների կյանքի կոչման նպատակով Արդարադատության նախարարությունն ու կառավարությունը մեծածավալ օրենսդրական փոփոխություններ և նաև պրակտիկ լուծումներ են նախատեսում։ Այս մասին «Առաջին լրատվական»-ի հետ զրույցում նշել է Արդարադատության փոխնախարար Սուրեն Քրմոյանը։
Նրա խոսքով, կոռուպցիայի դեմ պայքարում միայն ԵՄ-ի հետ համաձայնագիրը չէ, որ պետք է իրականացնել. «Մենք կոռուպցիայի դեմ պայքարելու խնդիր ունենք ոչ թե միջազգային հանրությանն ինչ-որ բան ցույց տալու, այլ հենց մեր քաղաքացիների գոհունակությունը, մեր քաղաքացիների ընկալումը փոխելու, նաև քաղաքացիների կողմից կոռուպցիոն երևույթների նկատմամբ անհանդուրժողականություն ձևավորելու համար։ Մենք առաջին հերթին պարտավորություններ ունենք մեր քաղաքացիների առջև, և կառավարությունն այդ ուղղությամբ աշխատանքներ է տանում»,-ասաց Քրմոյանը։
Ինչ վերաբերում է դատաիրավական բարեփոխումներին, փոխնախարարը նշեց, որ սահմանադրական փոփոխություններից բխող մեծածավալ փոփոխություններ են իրականացվում, այդ թվում դատական օրենսգրքում, դավարանների անկախությունն ապահովելու համար, դատական իշխանության անկախությունը, թափանցիկությունը և նաև քաղաքացիների ու բիզնեսի ընկալումը փոխելու համար։
«Բացի դատական համակարգից, ընդհանուր արդարադատության համակարգում ևս էական փոփոխություններ են տեղի ունենում և արդեն ոչ միայն օրենսդրական, այլև պրակտիկ դաշտում»,-ընդգծեց նա։